BE kritikon ndalimin e importeve të grurit ukrainas nga Polonia, Hungaria dhe Sllovakia
Nga OraNews Përditësimi i fundit 17 Prill 2023, 08:49
Komisioni Evropian kritikoi sot vendimet e marra nga vendet e Evropës Qendrore për ndalimin e importeve të grurit nga Ukraina.
Polonia, Sllovakia dhe Hungaria, të gjitha në kufi me Ukrainën, ndaluan së fundmi importet e grurit, vajrave dhe produkteve të tjera bujqësore.
Një përfaqësues i Komisionit theksoi sot se politika tregtare është kompetencë ekskluzive e Bashkimit Evropian dhe për këtë arsye masat e marra në mënyrë të njëanshme nuk mund të pranohen.
Informacione të mëtejshme nevojiten për të vlerësuar situatën, tha zëdhënësja, duke shtuar se koordinimi i vendimeve brenda BE-së është i rëndësishëm në kohë të vështira.
Bashkimi Evropian ka pezulluar përkohësisht tarifat për importet nga Ukraina pas pushtimit të Rusisë në vitin 2022, në një përpjekje për të lejuar një nga prodhuesit më të mëdhenj në botë të drithërave të vazhdojë të hyjë në tregjet globale.
Duke qenë se produktet ukrainase shpesh nuk rieksportohen, ministritë në Budapest dhe Varshavë argumentojnë se fermerët përballen me konkurrencë disproporcionale nga importet pa doganë.
Sllovakia ka ndaluar shitjen e grurit ukrainas për njerëzit dhe kafshët duke përmendur shqetësimet për praninë e supozuar të pesticideve në këto produkte.
Brukseli vuri në dispozicion pothuajse 60 milionë euro ndihmë bujqësore për vendet e prekura të BE-së në mars.
Një paketë e dytë e ndihmës është në diskutim, tha sot zëdhënësja.
Vendimi për rinovimin e pezullimit të përkohshëm të tarifave pritet të merret para fundit të qershorit.
Komisioni propozoi në shkurt që të parashikohen masa të reja mbrojtëse për të lehtësuar rivendosjen e tarifave nëse është e nevojshme
