Berisha në Pogradec: Rama përpiqet të blejë opozitën me Alibravën dhe Alibashën, por ne nuk shitemi
Nga OraNews Përditësimi i fundit 12 Mars 2023, 14:38
Nga Pogradeci ku prezantoi kandidatin për Bashkinë Zini Tollozhina, Sali Berisha i konsideroi zgjedhjet e 14 majit më të rëndësishmet në të 32 vitet e pas komunizmit.
Vetëm një orë pasi KQZ hodhi shortin për relatorët që do të vendosin se cila PD do të jetë në zgjedhje, ai theksoi se demokratët do të fitojnë.
Berisha: Por ne jemi të sigurt se jo vetëm do marrim pjesë me kandidatët tanë të lirisë, por do fitojmë zgjedhjet dhe do shkojmë drejt përmbysjes përfundimtare të regjimit monist të Edi Ramës.
Madje ai akuzoi Ramën për mënyrën e përzgjedhjes së konkurrentëve.
Berisha: Qytetarët shqiptarë nuk janë kurrë dakord me një fasadë opozitë. Edi Rama përpiqet të blejë opozitën me Alibravën dhe Alibashë, duke blerë siç bleu kryezbuluesin e SHBA-ve. Ka njerëz që shiten dhe blihen, por ka dhe të tjerë që nuk shiten dhe nuk blihen kurrë.
Sipas Berishës qeveria ka fonde për rritjen e pensioneve, por i shpërdoron.
Berisha: Ajo rrugë që nuk po përfundon kurrë, Qukës-Qafë Plloç, ajo kishte projektin, financimin. Është 43 km. Kushtonte me të gjitha përllogaritjet 70-73 milionë euro, asnjë qindarkë më shumë. Sa ka shkuar gjer më sot më thoni ju mua? 250 milionë euro dhe do të shkojë më shumë. Çfarë ndodh? Për të kuptuar se pse nuk rriten rrogat. Njëherë e bllokoi, pastaj tha: jo, jo nuk është projekti. Bankat nuk japin kurrë kredi, po nuk çove projektin dhe po nuk e studiuan një për një atë. Nuk japin kredi ato.
Pavarësisht nisjes së takimeve në rrethe Berisha ende nuk ka zbardhur se me cilat parti do të jetë në koalicion.
