Më 3 mars vendimi nëse Eva Kaili do të qëndrojë në paraburgim
Nga OraNews Përditësimi i fundit 28 Shkurt 2023, 17:33
Kanë përfunduar në Gjykatën e Apelit të Brukselit seancat me dyer të mbyllura të Eva Kailis dhe Mark Tarabellas, pas ankimimit të tyre.
Avokati i Kailit, Michalis Dimitrakopoulos, në një deklaratë për gazetarët tha se vendimi për zonjën Kaili pritet më 3 mars.
“Vendimi do të dalë më 3 mars dhe ne nuk duam që deklaratat tona të ndikojnë negativisht në vendim. I thamë të gjitha argumentet ligjore dhe faktike”, tha avokati i zonjës Kaili, duke theksuar se procedura e sotme zgjati një orë e gjysmë.
Trupa e paraburgimit më 16 shkurt vendosi të zgjasë me dy muaj paraburgimin Eva Kailit dhe një muaj për Tarabellën, por të dy e apeluan këtë vendim.
Kaili u shkarkua më 13 dhjetor nga posti i zëvendëspresidentes së Parlamentit Evropian për akuzat për korrupsion.
Eurodeputetja greke dhe tre të dyshuar të tjerë u arrestuan nga policia belge si pjesë e një hetimi për korrupsion dhe pastrim parash.
