Dalin pamjet e autobusit pas aksidentit në Rumani, dëshmitë e pasagjerëve: Ishte si masakër

Nga OraNews Përditësimi i fundit 24 Dhjetor 2022, 16:40

Një video dokumentar tregon se çfarë ndodhi disa sekonda pas aksidentit të autobusit turistik grek në Rumani.

Si pasojë e përplasjes së autobusit, i cili po transportonte grekët që kishin nisur udhëtimin drejt Bukureshtit, me kufizuesin e lartësisë, një person ka humbur jetën dhe të paktën 23 të tjerë janë plagosur.

Dëshmitë e grekëve që ndodheshin në autobus janë tronditëse, ndërsa “video të reja dokumentare po dalin në dritë”.

“Sapo morëm kthesën, papritmas ndjeva një zhurmë që më goditi diçka, ndjej një peshë në shpinë, koka ime ishte futur në pykë para sediljes. E ndjeja peshën nga lart. Fillova të bërtas, nuk marr dot frymë...”, thotë një e re e cila është shëndoshë e mirë.

“Ishte si një masakër. Duke parë gjak kudo, njerëz që qajnë, njerëz që nuk e dinë se çfarë po ndodh..."

Stacioni TV OPEN transmetoi videon ku shihen skenat e para që u shfaqën menjëherë pas përplasjes fatale, para se policia dhe zjarrfikësja të mbërrinin në vendngjarje.

Pamjet e reja që kanë dalë në dritë janë tronditëse.

Mbizotëron paniku, ndërsa në dyshemenë e mjetit shihet një burrë, i cili tenton të ndihmojë personat që janë shtypur nga çatia e autobusit dhe në një moment ai bërtet "Merr frymë".

Sipas informacioneve të reja, shoferi në deklaratën e tij për autoritetet rumune tha se ka bërë një gabim GPS, duke e çuar në një rrugë ku autobusët normalisht nuk kalojnë, ndërsa foli edhe për lodhjen që kishte, teksa udhëtonte me autobus për 16 orë rresht.

Duhet theksuar se raportimet për aksidente trafiku në këtë pikë janë të shumta.

Sipas një pasagjeri të autobusit, përplasja ka prekur kryesisht sediljet e përparme deri në mes të autobusit, afër derës së pasme.

Nga ana e tyre, autoritetet rumune kanë njoftuar të gjithë udhëtarët grekë se mund të apelojnë shtetin rumun për aksidentin.

Disa pasagjerë po kthehen në Greqi

Sipas burimeve diplomatike, nëntë pasagjerë që janë në gjendje të mirë shëndetësore janë kthyer tashmë drejt Greqisë me fluturimin Bukuresht-Athinë në orën 10:45, ndërsa nëntë të tjerë do të kthehen pasdite.

Pasagjerët, mes të cilëve edhe banues në Selanik, pritet të transportohen në destinacionet e tyre, nga aeroporti, me autobusë.

Pasagjerët që janë në gjendje të mirë shëndetësore dhe kanë shprehur dëshirën për t'u kthyer po kthehen në Greqi, ndërsa disa kanë vendosur të qëndrojnë në Bukuresht ndërkohë që të afërmit e tyre po trajtohen.

Një fluturim me shtatë pasagjerë të autobusit të aksidentuar do të mbërrijë edhe në aeroportin e Selanikut, sipas ERT.

Nikos Chlopsios është udhëtari që humbi jetën

Nikos Chlopsios ishte 53 vjeç dhe jetonte me familjen në Larisa.

Ai ishte baba i dy fëmijëve, një vajze 24-vjeçare dhe një djali 21-vjeçar.

Në ekskursionin fatal ai ishte me gruan e tij, me të cilën pas vitesh udhëtuan jashtë vendit.

Pas aksidentit, gruaja e tij nuk u informua menjëherë për vendndodhjen e burrit të saj.

Fëmijët e tij nga Larisa e mësuan fillimisht me telefon.

Familja e tij po jeton një dramë me nënën e viktimës, e cila nuk mund ta imagjinojë se nuk do ta shohë më djalin e saj.