Scholz thirrje Putin: Tërhiq trupat nga Ukraina, kërko zgjidhje diplomatike
Nga Amado Çela Përditësimi i fundit 2 Dhjetor 2022, 14:06
Gjermania bëri përpjekje për të ulur tonet ushtarake mes Rusisë dhe Ukrainës. Kancelari gjerman Olaf Scholc telefonoi presidentin Putin, të cilit i kërkoi të ndalojë sulmet ndaj infrastrukturës civile, Kremlini i justifikoi sulmet ajrore me shpërthimin e urës së Krimesë.
Kancelari gjerman Olaf Scholz të premten i bëri presion presidentit rus Vlarimir Putin të kërkojë një zgjidhje diplomatike për t’i dhënë fund luftës së tij në Ukrainë, përfshirë tërheqjen e trupave ruse.
Sipas Berlinit zyrtar, gjatë telefonatës njëorëshe, Scholz dënoi në veçanti sulmet ajrore të Rusisë kundër infrastrukturës civile në Ukrainë dhe theksoi vendosmërinë për të mbështetur Ukrainën në sigurimin e kapaciteteve të saj mbrojtëse kundër sulmit rus.
Kremlini njoftoi se presidenti rus i bëri thirrje palës gjermane që të rishqyrtojë qasjen e saj për Ukrainën.
"Sulmet ajrore ruse janë një përgjigje e detyruar dhe e pashmangshme ndaj sulmeve provokuese të Kievit kundër infrastrukturës civile ruse përfshirë urën e Krimesë dhe objektet energjetike," thuhet ne deklarate.
Liderët gjithashtu diskutuan çështjen globale të sigurisë ushqimore, e cila është nën presion për shkak të luftës.
Sipas zëdhënësit të Scholz, ata u dakorduan që të mbajnë kontaktet.
Scholz dhe Putzin kanë qenë në kontakt telefonik të rregullt gjatë luftës.
Telefonata e kaluar ndërmjet tyre u zhvillua në shtator dhe zgjati 90 minuta me Scholzin që gjithashtu i kërkoi Putin të shkojë drejt zgjidhjes diplomatike sa më shumë të jetë e mundur, bazuar në armëpushim.
