E lanë të lirë pasi e ndaluan të kërkuarin, pezullohen shefi dhe specialistja e Narkotikëve Elbasan

Nga OraNews Përditësimi i fundit 12 Shtator 2022, 20:08

Drejtoria Rajonale e AMP Elbasan ka ekzekutuar vendimin penal dhënë nga Gjykata e Shkallës së Parë Elbasan, datë 11 shtator 2022, për caktimin e masës së sigurimit personal me karakter ndalues “Pezullim i ushtrimit të një detyre a shërbimi publik” në ngarkim të punonjësve të policisë:

– Nënkomisar Ulian Shpataraku, 37 vjeç, me detyrë Shef i Seksionit të Trafiqeve të Paligjshme dhe Narkotikëve në DVP Elbasan;

– Nënkomisare Sovjona Kapllanaj, 45 vjeçe, me detyrë Specialiste pranë Seksionit të Trafiqeve të Paligjshme dhe Narkotikëve në DVP Elbasan.

Sipas drejtorisë Rajonale të AMP Elbasan, efektivët janë pezulluar në kuadër të procedimit penal nr.1200, viti 2022, të Prokurorisë së Rrethit Gjyqësor Elbasan, i ndjekur nga AMP Elbasan nën drejtimin e kësaj Prokurorie.

Dyshohet se në shpërdorim të detyrës, këta punonjës policie nuk kanë zbatuar procedurat standarde për ndalimin e një shtetasi në kërkim policor.

Ora News mëson se efektivët kanë kapur shtetasin Endrit Filja, i cili ishte në kërkim dhe më pas e kanë lënë të lirë.

Filja mësohet se akuzohej për përshtatjen e lokalit për përdorim droge, neni 285/a i kodit të procedurës penale.