"Lufta e ftohtë moderne", SHBA-ja, Franca dhe Rusia në "garë" për Afrikën
Nga Ora News Përditësimi i fundit 28 Korrik 2022, 09:37
Udhëheqësit rusë, francezë dhe amerikanë kanë zhvendosur vëmendjen e tyre në Afrikën për të fituar mbështetje për pozicionet e tyre në luftën në Ukrainë, duke zhvilluar atë që disa thonë se është konkurrenca më intensive për ndikim në kontinent që nga Lufta e Ftohtë.
Ministri i Jashtëm rus Sergey Lavrov dhe presidenti francez Emanuel Macron po vizitojnë secili disa vende afrikane këtë javë.
Samantha Poëer, kreu i Agjencisë Amerikane për Zhvillim Ndërkombëtar, shkoi në Kenia dhe Somali javën e kaluar.
Ambasadorja e SHBA-së në OKB, Linda Thomas-Greenfield, do të shkojë në Gana dhe Ugandë javën e ardhshme.
“Është si një Luftë e re e Ftohtë që po luhet në Afrikë, ku palët rivale po përpiqen të fitojnë ndikim”, tha William Gumede, drejtor i Democracy Works.
Lavrov, në udhëtimet e tij në kontinentin e goditur nga thatësira dhe uria, ka kërkuar të portretizojë Perëndimin si "zuzar", duke e fajësuar atë për rritjen e çmimeve të ushqimeve, ndërsa liderët perëndimorë kanë akuzuar Kremlinin për përdorimin cinik të ushqimit si armë dhe se po kryen një luftë pushtuese të shëmtuar, raporton Associated Press.
Përmes presidentit Vladimir Putin, Rusia ka punuar për të fituar mbështetje në Afrikë për disa vite, duke rigjallëruar miqësitë që datojnë gjysmë shekulli më parë, kur Bashkimi Sovjetik mbështeti shumë lëvizje afrikane që luftonin për t'i dhënë fund sundimit kolonial.
"Tani ajo fushatë ka hyrë një vrull më të shpejtë," tha Gumede.
Ndikimi i Moskës në Afrikë u shfaq në mars gjatë votimit të OKB-së për të dënuar pushtimin rus të Ukrainës. Ndërsa 28 vende afrikane votuan në favor të rezolutës, një pakicë e konsiderueshme e vendeve në kontinent, 25 të tilla, ose votuan për të abstenuar ose nuk votuan fare.
Kryediplomati rus vizitoi këtë javë Egjiptin, Kongon, Ugandën dhe Etiopinë, duke u zotuar për miqësi dhe duke akuzuar Shtetet e Bashkuara dhe vendet evropiane për rritjen e çmimeve të ushqimeve duke ndjekur politika mjedisore "të pamatura". Ai gjithashtu i akuzoi ata për grumbullimin e ushqimit gjatë pandemisë COVID-19.
“Situata në Ukrainë ndikoi gjithashtu negativisht në tregjet ushqimore, por jo për shkak të operacionit special rus, por për shkak të reagimit absolutisht joadekuat të Perëndimit, i cili shpalli sanksione”, tha Lavrov në Addis Abeba, kryeqyteti i Etiopisë.
