"Biden nuk e duan as të vetët", 75% e demokratëve nuk duan që presidenti të rikandidojë në 2024-n
Nga Amado Çela Përditësimi i fundit 28 Korrik 2022, 09:21
Pas rënies së njëpasnjëshme të aprovimit të punës së presidentit Biden nga votuesit amerikanë, një sondazh nga mediet e majta kanë zbuluar se 75% e partisë së tij nuk duan që ai të kandidojë sërish në 2024.
Pasiviteti i presidentit Biden gjatë kësaj jave, jo për faj të tij por për shkak të infektimit me Covid-19 e ka dërrmuar mbështetjen e 79-vjeçarit nga Partia Demokratike.
Një sondazh i publikuar nga media e majtë CNN ka gjetur se afro 75% e demokratëve nuk duan që presidenti Biden të kandidojë për një mandat të dytë presidencial në vitin 2024.
Gjetjet e fundit vijnë pasi mbështetja e Biden nga votuesit amerikanë ka qenë ndër më të ulëtat ndër vite.
Sa i përket ekonomisë së vendit, aprovimi për Biden ka rënë në 30%.
Sipas sondazhit vetëm 25% e votuesve demokratë duan që Biden të rikandidojë sërish në 2024-n, ndërsa shifra e mbështetjes në muajin shkurt ishte 45%.
24% e të majtëve duan që ai të largohet nga gara pasi mendojnë se ai nuk mund të fitojë, ndërsa 32% nuk duan që ai të rikthehet në zyrë.
Entuziazmi për Biden është më i ulëti në mesin e demokratëve të rinj, me vetëm 18% të atyre nën 45 vjeç që preferojnë 79-vjeçarin si kandidatin e tyre për vitin 2024.
Mëkatet që bien mbi presidentin janë rritja e çmimeve, e shkaktuar nga inflacioni i paprecedentë për të cilën Biden fajëson Rusinë.
Ndërsa mbështetja për 79-vjeçarin sa vjen edhe ulet, megjithëse me një përçarje mes tyre te republikanët Donald Trump mbetet më i preferuari i të djathtëve.
76-vjeçari i cili pritet të kandidojë sërish në vitin 2024 ka mbështetjen e mbi 70% të republikanëve ndërsa ndiqet nga guvernatori i Floridas Ron DeSantis, disa senatorë të tjerë dhe ish-nënpresidenti Mike Pence.
