Amaneti vihet në vend. Emri i Hasan Prishtinës përjetohet në bronz. Nipi rrëfen si iu realizua ëndrra në Vlorë
Nga OraNews Përditësimi i fundit 9 Maj 2022, 20:18
Hasan Prishtina është një ndër figurat më të mëdha të historisë së shtetit shqiptar. Një hero me shumë dimensione. Diplomat ekselent , atdhetar dhe luftarak deri në vetëmohim në emër të kombit shqiptar.
Kryeministri i 8 i Shqipërisë, një nga ideologët kryesorë të tezës: “Pa Kosovë nuk ka Shqipëri”. Hasan Prishtina lindi në vitin 1873 në qytetin e Vushtrisë. Në gjakun e tij rridhte kultura e familjes së bejlerëve , një ndër më të nderuarat në vend. Mësimet e para i kreu në vendlindje dhe më pas u shkollua në gjimnazin frëng të Selanikut. Ndërsa studimet e larta i kreu në qytetin e Stambollit për juridik.
Një patriot që është përjetësuar falë veprave dhe kontributit të padiskutueshëm që ka në historinë e vendit tonë. I ftuar në emisionin “Jeto me orën” në RTV Ora stërnipi i tij Mehmet Prishtina rrëfeu më shumë për atë si figurë historike, por edhe për përjetësimin e figurës së tij në qytetin e Vlorës që u nderua para disa ditësh.
Me aktivitetin që u zhvillua në Vlorë për rijetësimin e figurës historike Hasan Prishishtina, duket se u përmbush ëndrra 100 vjeçare e gjithë Kosovës dhe familjarëve të tij, një amanet që më në fund u çua deri në fund.
Mehmet Prishtina: “Në kohën e luftës në Kosovë të gjithë u larguan. Komunikimi i fundit me babin tim ka qenë nëpërmjet telefonit sepse më pas u vra. Para se të vdiste më la 2 amanete të cilat më në fund u çuan në vend”.
Eventin e ndodhur në Vlorë para pak ditësh Mehmet Prishtina e quan si një mrekulli pasi ishin prezentë dhe shumë figura politike dhe jo vetëm. Pjesëmarrja ishte shumë e madhe ku kishte të ftuar nga të gjitha trevat shqiptare.
Kur grupi polifonik mori vesh që do rijetësohej figura e Hasan Prishtinës realizuan një këngë e cila i emocionoi të gjithë.
Monumenti i tij u vendos afër universitetit “Ismail Qemalit” dhe diagonal me figurën e tij.
