Abramovich me simptoma helmimi pasi shkoi në Rusi, të prekur edhe delegatët ukrainas
Nga OraNews Përditësimi i fundit 28 Mars 2022, 17:38
Oligarku rus Roman Abramovich dyshohet se ka simptomat e helmimit.
Po ashtu, një gjë të tillë e kanë denoncuar edhe anëtarët e delegacionit ukrainas për negociatat e paqes.
Manjati rus me bizneset e tij në Londër kishte propozuar veten si ndërmjetës në konfliktin mes Rusisë dhe Ukrainës.
Në orët e fundit, sipas raportimeve, ai fluturoi për në Moskë me një fluturim privat nga Turqia ku u strehua për t'i shpëtuar sanksioneve dhe transportonte një letër nga Zelensky drejtuar Putinit.
Më herët, oligarku ishte takuar me presidentin ukrainas.
Një raund i ri negociatash është planifikuar për nesër në Turqi mes dy delegacioneve nga ministritë e jashtme përkatëse.
Abramovich, 55 vjeç, me pasaportë ruse dhe izraelite, është treguar vazhdimisht si një pikë kontakti midis dy palëve në konflikt, pasi nëna e tij ka lindur në Ukrainë.
