Borell për Shqipërinë dhe Maqedoninë: S'ju premtoj datë për negociata, por mund t'ju premtoj se do…

Nga OraNews Përditësimi i fundit 14 Mars 2022, 14:00

Përfaqësuesi i Lartë i Bashkimit Evropian për Politikat e Jashtme, Josep Borrell, duket se i ka vënë veton bullgare Maqedonisë së Veriut lidhur me perspektivën evropiane të vendit. Borrell tha nga Shkupi se nuk i premton vendit nëse do të nisin negociatat këtë vit.

"Unë nuk mund t'ju premtoj një datë, por mund t'ju premtoj se do ta bëni dhe aty ku ka vullnet, ka një mënyrë për të gjetur një zgjidhje," tha përfaqësuesi i lartë evropian për Punët e Jashtme dhe Politikën e Sigurisë Josep Borrell në takimin me kryeministrin maqedonas Dimitar Kovaçevski.

Në konferencën e përbashkët për shtyp, ai përsëriti se fillimi i negociatave me Maqedoninë dhe Shqipërinë është prioritet, por pa asnjë njoftim nëse mund të pritet në samitin e qershorit, pavarësisht këmbënguljes së Kovaçevskit se lufta në Ukrainë kërkon vendime strategjike nga Unioni dhe se vendimi për fillimin e negociatave me Maqedoninë e Veriut duhet të merret sa më parë.  

“Ky është një moment zgjimi për Evropën, një moment kur procesi i zgjerimit me vendet e Ballkanit Perëndimor duhet të ringjallet. E di që keni pritshmëri të caktuara dhe me të drejtë. Ne duhet të fillojmë negociatat formale për pranimin e Maqedonisë së Veriut dhe Shqipërisë sa më shpejt të jetë e mundur dhe shpresoj se kjo do të jetë e mundur në konferencën e ardhshme ndërqeveritare”, tha Borrell.

Ai tha se Maqedonia dhe i gjithë rajoni janë prioritet strategjik dhe BE-ja është e përkushtuar që perspektiva evropiane të bëhet realitet për këto vende. 

Ai gjithashtu përshëndeti momentin e ri midis Maqedonisë dhe Bullgarisë, duke theksuar se ai inkurajon të dyja palët të gjejnë zgjidhje të pranueshme reciprokisht dhe të zgjidhin çështjet dypalëshe sepse "zgjerimi nuk mund të vazhdojë nëse pengohet nga çështjet dypalëshe".

“Unë e kuptoj plotësisht zhgënjimin që shumë e ndjejnë këtu në Maqedoninë e Veriut. Unë vij nga Spanja, e cila gjithashtu duhej të priste një kohë të gjatë. Por do të përsëris se negociatat për anëtarësim me Maqedoninë dhe Shqipërinë janë prioritet i lartë për BE-në dhe ne vazhdimisht vlerësojmë se vendet janë të gatshme t'i fillojë ato. Nuk është një deklaratë retorike, por një vlerësim dhe përkushtim i vendosur, në fakt një deklaratë synimi që thotë se është një prioritet për ne. Vendimet e qeverisë së Maqedonisë së Veriut e lidhin edhe më shumë vendin me BE-në, por ka një problem dhe ju e dini kush, të cilin ne po mundohemi ta zgjidhim me të gjitha kapacitetet tona për bindje. Komisioneri i BE-së është plotësisht i përfshirë në këtë proces dhe ne jemi duke biseduar me Bullgarinë derisa kjo çështje të zgjidhet. Është pozitive që e shoh shumë më mirë tani që ka një vullnet më të fortë mes dy premierave për të arritur një zgjidhje. Çështjet dypalëshe nuk duhet të rrezikojnë më asnjë proces pranimi, edhe kur ato bazohen në dallimet etnike-gjuhësore," tha Borrell. 

Ai përsëriti detyrat përpara Maqedonisë.

:Paralelisht, reformat e Maqedonisë së Veriut në sundimin e ligjit, lufta kundër korrupsionit, transformimi dixhital dhe axhenda e gjelbër do të mundësojnë përparim të shpejtë drejt negociatave. Të gjithë aktorët duhet të punojnë së bashku për të çuar përpara axhendën e reformave evropiane si mënyra më e shpejtë për vendin për të ecur përpara në rrugën evropiane," tha ai.

Borrell vlerësoi gjithashtu pozicionin e vendit për mosmarrëveshjen ruso-ukrainase, duke mbështetur sanksionet dhe duke dënuar agresionin e Rusisë kundër Ukrainës. 

Sipas tij, ky është një sulm barbar i Putinit ndaj popullit ukrainas.

“Vendimi për të respektuar masat kufizuese tregon qartë përkushtimin tuaj ndaj vlerave të BE-së dhe ju vë në rrugën drejt Evropës jo vetëm si kandidat për anëtarësim, por edhe si anëtar i përgjegjshëm i komunitetit ndërkombëtar, sepse për çfarë po flasim. është një zgjedhje morale, dhe jo zgjedhje për shkak të llogaritjeve. Jam i bindur se ju po e zgjidhni këtë në bazë të parimeve morale," tha Borrell, duke njoftuar një paketë të katërt sanksionesh kundër Rusisë.

Kryeministri Kovaçevski, nga ana tjetër, tha se Maqedonia është në BE, duke shpresuar se së shpejti do të caktohet një datë për fillimin e negociatave me BE-në.

“Zgjidhja e çështjeve me Bullgarinë duhet të jetë në frymën e vlerave evropiane dhe vendimi duhet të pranohet nga të gjitha vendet anëtare. Bisedova me Borrellin dhe më siguroi se do ti përcillte porositë  në KE, që për Maqedoninë e Veriut dhe Shqipërinë duhet të nisin sa më shpejt negociatat për anëtarësim në BE. Vendi ynë është në BE, anëtarësimi në BE u jep përfitime ekonomike qytetarëve, forcon sigurinë”, tha Kovaçevski.