Kriza në Kazakistan, presidenti: Qëlloni për të vrarë, janë banditë dhe terroristë
Nga OraNews Përditësimi i fundit 8 Janar 2022, 16:36
Presidenti kazak Tokajev ka mbledhur shtabin për gjendjen e jashtëzakonshme në vend, me pjesëmarrjen e zyrtarëve më të lartë në Kazakistan.
Më herët, presidenti ka dhënë urdhër që autoritetet policore dhe ato ushtarake të qëllojnë pa paralajmërim dhe për të vrarë, sepse, sipas tij, shumë kriminelë dhe banidtë janë pjesëmarrës në protestat qytetare dhe synojnë destabilizimin e vendit.
Operacionet e zhvilluara kundër grupeve të ndryshme protestuesish, nga autoritetet kazake janë cilësuar si operacione anti-terror.
Në ndihmë të autoriteteve kazake kanë mbërritur edhe divizione paqeruajtës të Organizatës së Traktatit të Sigurisë Kolektive, ku bën pjesë edhe Rusia.
Republika më e pasur e Azisë qendrore u trondit nga protesta masive për shkak të çmimeve të gazit të lëngshëm dhe të naftës.
Pas rritjes së çmimit të karburantit, më 2 janar shpërthyen demonstrata masive në disa pjesë të vendit. Për autoritetet, protestat publike janë të paligjshme nëse organizatorët e tyre nuk paraqesin një njoftim paraprakisht.
Ndërkohë, mediet ndërkombëtare shkruajnë edhe për arrestime të zyrtarëve të lartë të akuzuar për tradhëti ndaj atdheut.
Ish-kreu i Shërbimit Informativ të Kazakistanit është arrestuar nën dyshimin për tradhti, pasi më herët ai u pushua nga puna prej trazirave të paprecedenta.
