3 ton kokainë brenda kontenjerit në Kalabri, sasia e sekuestruar do të sillte përfitim rreth 1 mld euro
Nga Alba Kepi Përditësimi i fundit 31 Dhjetor 2021, 09:46
Autoritetet financiare të Guadia di Finanza kanë kapur në portin Gioia Tauro të Kalabrisë, mbi 3 ton kokainë e cilësisë mjaft të pastër.
Droga u kap pas një aktiviteti kompleks të analizës së riskut, kryer nga Autoritetet doganore të portit e Guardia di Finanza kalabreze e përmes skenareve të sofistikuar që vunë nën kontroll rreth 3000 kontejner të ardhur nga Amerika e Jugut.
Kokaina u gjet gjatë dy operacioneve të ndryshme brenda portit.
Autoritetet italiane mundën të zbulojnë 2.272,515 kilogramë kokainë fshehur në 3 kontejner që transportonin banane, kikirina e piper.
Ndërsa 855,690 kilogramë të tjera u gjetën gjatë kontrollit në automjetet në dalje të portit. Shoferi i një kamioni që transportonte soba elektrike kreu një manovër të dyshimtë që çoi në kontrollin më të detajuar nga ana e autoriteteve doganore e të financës.
Fshehur në arka me banane u zbulua kjo sasi droge e shoferi u vu nën arrest me burg për trafik lëndësh narkotike e është në dispozicion të autoriteteve gjyqësore për hetimet e mëtejshme të ngjarjes.
Sipas Guardia di Finanzës italiane kokainë ishte e cilësisë mjaft të pastë e do të përpunohej të paktën katër herë para se të hidhej në treg nga grupet kriminale.
"Përgjithësisht 3.128,205 kg kokainë e sekuestruar do të sillte në treg një përfitim rreth 1 miliardë euro", informon Financa Italiane.
Mënyrat e fshehjes së lëndës narkotike nga ana e grupeve kriminale shfaqen gjithmonë e më të ndryshme e në evolucion duke detyruar investiguesit italianë të përfeksionojnë metodat e tyre operative.
Porti Gioia Tauro në Kalabri konsiderohet porta e privilegjuar e hyrje daljes së trafiqeve të paligjshme të mafias kalabreze Ndrangheta.
