Mbërrijnë në Shkup trupat e pajetë të viktimave të aksidentit tragjik në Bullgari. Në aeroport Osmani e Nikolla
Nga OraNews Përditësimi i fundit 3 Dhjetor 2021, 11:59
Dy avionë ushtarakë kanë sjellë 45 trupat e pajetë të aksidentit tragjik në Bullgari ku autobusi me të cilin udhëtonin u përfshi nga flakët në 23 nëntor.
Në pritjen e trupave të viktimave morën pjesë familjarët e tyre, zyrtarë të larë politikë nga Maqedonia, Shqipëria dhe Kosova si edhe krerë të komuniteteve fetare.
Kryeministri Zaev, presidenti Pendarovski, ministri i Jashtëm, Bujar Osmani, kreu i BDI-së, Ali Ahmeti dhe ministra të tjerë të Maqedonisë së Veriut nderuan viktimat.
Delegacioni i Shqipërisë përfaqësohej nga kryetarja e Kuvendit, Lindita Nikolla, ministrat Peleshi, Çuçi dhe Spiropali, ndërsa nga Kosova u kujdes të merrte pjesë presidentja Vjosa Osmani.
Kortezhi mortor i viktimave u mbajt edhe në rrugët e Shkupit, ku qytetarët patën mundësi të dërgonin nderimet e tyre të fundit për bashkëkombësit e tyre, që humbën jetën në aksidentin fatal në autostradën e Strumës.
Prokuroria bullgare ka nxjerrë detaje të reja të enjten lidhur me aksidentin.
Sipas saj bankinat me të cilat u përplas autobusi në sheshpushimin e autostradës kanë qenë të vendosura gabim.
Aksidenti ndodhi në orët e para të 23 nëntorit, autobusi famëkeq vinte nga Stambolli për në Shkup, në bord kishte 52 persona, 45 prej të cilëve humbën jetën në vend dhe 7 të tjerë ngelën të lënduar.
