Gazetari Isa Myzyraj: Unë zoti Veliaj nuk kam fare, po fare turp kur t’u them prindërve të mi se çfarë punoj
Nga Isa Myzyraj Përditësimi i fundit 19 Nëntor 2021, 16:35
Unë zoti Veliaj nuk kam fare, po fare turp kur t’u them prindërve të mi se çfarë punoj, e ku punoj, madje jam shumë krenar për gjithçka që bëj, e kam bërë!
Unë punoj në media, e cila tani quhet Ora News, nesër mund të punoj në një tjetër logo, por kurrë nuk do të vendos në pazar parimet e mia dhe këtë besoj e di, ta kanë thënë besoj përgjigjen time, një përgjigje që do e marrësh të njëjtën përherë, por tjetër muhabet ky.
Unë nuk e kam për turp zoti Veliaj që në darkë në bisedë me mamin tim modeste bëjmë llogari shpenzimet e muajit, që si unë si ajo i kemi të deklaruara kokërr më kokërr pranë institucioneve, unë si gazetar e ajo si punonjëse fasonerie, që me pagën e saj mban edhe bashkëshortin e sëmurë, dhe s’ka asnjë shans që të kursejë ndoshta për ahengje familjare a ndonjë dasmë për djalin ndonjëherë.
Unë nuk e mbroj dot Ylli Ndroqin zoti Veliaj, s’do e bëj kurrë, sepse jam gazetar!
Por, ama do kërkoj gjithmonë llogari për punët e pabëra në Tiranën ku unë jetoj, derdh taksa çdo muaj dhe jam prej 5 vitesh banor i saj.
Unë kam shkruar kundër shkatërrimit të Tiranës para se të jem gazetar në Ora News, që të zhduket alibia që kam ndonjë interes të caktuar, e kam bërë që në 2015-ën e këtej, lehtësisht e vërtetueshme, do vijoj ta bëj përsëri e përsëri.
Do vijoj ta drejtoj mikrofonin sa herë të të shoh, e do të gjej sa herë të përpiqesh t’u ikësh medieve, siç ke bërë që në 2015-ën kur nuk ke mbajtur asnjë konferencë për gazetarë.
Unë do të vijoj të kërkoj përgjigjet e munguara për pyetjet që shqetësojnë qytetarët e Tiranës zotëri dhe s’do më ndalosh as me intimidimet e tua, as me shantazhet e aq më pak duke më përmendur prindërit e mi që s’i kuptojnë kurthet e ndyra të pushtetarëve ndaj kujtdo që i kundërvihet.
