"Edhe unë jam vajzë minatori" Gazetarja e Ora News përlotet teksa raporton për teknikun e bllokuar në galeritë e Bulqizës
Nga OraNews Përditësimi i fundit 17 Shtator 2021, 10:59
Gazetarja e Ora News, Sonila Musai nuk ka mundur t'i mbaj lotët gjatë raportimit live nga minierat e Bulqizës, ku prej 3 ditësh gjendet i bllokuar minatori Muharrem Plaku.
Teksa raporton për situatën, Sonila tregoi se edhe ajo është vajzë minatori dhe është rritur duke dëgjuar raste vdekjesh dhe incidentesh në minierat e Bulqizës.
Ajo rrëfen se babi i saj ka pësuar një incident të tillë, por për fat të mirë ai shpëtoi.
"Unë jam banore e këtij qyteti dhe mbaj mend që e vogël dëgjoja vazhdimisht, që minatorët humbnin jetën në galeri.
Jo vetëm minatorët por edhe të rinjtë, që e kanë këtë galeri si të vetmen mundësi për të mbajtur familjet e tyre.
Janë raste të përsëritura, kërkoj ndjesë për emocionet. (qan)
Një rast të tillë e kam pasur edhe vetë në familje, pasi unë jam një vajzë minatori.
Një rast i tillë i ka ndodhur dhe babait tim, ku fatkeqësisht kolegu i tij ndërroi jetë.
Por Zoti e shpëtoi babain tim dhe për këtë jam falenderuese. Minierat në Bulqizë janë e vetmja mundësi ku kryefamiljarët të mbajnë familjet e tyre.
Nga ana e institucioneve nuk është marrë asnjë masë se pse kaq shumë persona po humbin jetën në miniera. Nuk kanë mundësi tjetër edhe pse e dinë se hynë të gjallë dhe nuk e dinë si do të dalin. Ashtu siç është dhe rasti i Muharremit", rrëfen Sonila mes lotësh.
