Rrëshqitja e baltës në Japoni merr përpara shtëpitë, 19 persona të zhdukur

Nga OraNews Përditësimi i fundit 3 Korrik 2021, 11:18

Të paktën 19 persona janë zhdukur pasi një rrëshqitje e fuqishme e baltës rrëmbeu shtëpitë në qytetin Atami, në perëndim të Tokios.

Zyrtarët e menaxhimit të katastrofave në prefekturën Shizuoka, Japonia qendrore, thonë se rrëshqitja e dheut ndodhi të shtunën në mëngjes në qytet.

Zyrtari i administrimit të katastrofës prefekturore, Takamichi Sugiyama tha se dhjetëra shtëpi mund të jenë varrosur dhe punëtorët e shpëtimit po kërkojnë të paktën 19 persona.

Ai shtoi se numri i të zhdukurve mund të rritet. Sugiyama gjithashtu tha që rrëshqitja e baltës ndodhi në zonën e quajtur Izusan dhe theksoi se disa njerëz në zonë besohet të jenë evakuuar.

Ai tha se kishte rënë shi i fortë në zonë gjatë gjithë mëngjesit. Pamjet televizive treguan një valë balte të zezë që rrëshqiste poshtë malit, duke rrëzuar dhe shkatërruar shtëpi në rrugën e saj ndërsa banorët e pafuqishëm shikonin të tmerruar, disa duke regjistruar në telefonat e tyre.