"Djajtë vallëzues" kërkojnë fundin e pandemisë Covid në botë
Nga OraNews Përditësimi i fundit 5 Qershor 2021, 21:48
Anëtarët e një vëllazërie ceremoniale të Venezuelës të njohur si "Djajtë Vallëzues " mbajtën kremtimin e tyre vjetor të "Corpus Christi" duke bërë thirrje për fundin e pandemisë Covid-19 në vend dhe botë.
Grupet e burrave dhe të rinjve të rritur në qytete përgjatë bregdetit qendror të Venezuelës e ndjekin këtë ceremoni që nga vitet 1700.
Ata vishen si djaj të maskuar dhe mbajnë një ritual në të cilin ata i dorëzohen Zotit si pjesë e një fitoreje simbolike të së mirës mbi të keqen.
Kremtimi i festës katolike romake përzien traditat indigjene, afrikane dhe spanjolle, sipas ministrisë së kulturës.
Festimet në Naiguata, një qytet 52 kilometra në verilindje të kryeqytetit Karakas, filluan të enjten, 3 qershor. Banorët luanin me daulle dhe kërcimtarët visheshin si djaj që merrnin një formë kafshe, të tilla si kuaj, qen apo mace, me këmbanat të lidhura në bel.
"Ne duhet të kërkojmë zhdukjen e pandemisë në të gjithë botën sepse ajo që po përjetojmë është e keqe", tha Henry Gonzalez, i cili ka vallëzuar me grupin për 50 vjet pasi filloi në moshën 7 vjeç.
"Ne e bëjmë këtë në mënyrë që tradita të mos zbehet kurrë," tha ai.
Organizata e Kombeve të Bashkuara Arsimore, Shkencore dhe Kulturore (UNESCO) shpalli Djajtë Vallëzues pjesë të Trashëgimisë Kulturore Jomateriale të Njerëzimit në 2012.
"Autoritetet lejuan festivalin sepse djajtë mbajnë maska fytyre nën maskat e tyre dekorative dhe ceremonia në natyrë respektonte masat e distancës pandemike," tha Efren Yriarte, kreu i shoqatës së djallit vallëzues në Naiguata.
"Disa valltarë "po luten që kjo pandemi të marrë fund, sepse shumë njerëz kanë vdekur. Të afërmit e valltarëve kanë vdekur," tha Ervis Rodriguez, i cili ka kaluar më shumë se 20 vjet në vëllazëri.
Të dhënat zyrtare të Venezuelës tregojnë më shumë se 238,000 raste të koronavirusit dhe 2,689 vdekje, por shumë ekspertë shëndetësorë mendojnë se shifrat aktuale mund të jenë shumë më të larta.
