KESH, 46.9 mln lekë në tendera pa garë
Nga OraNews Përditësimi i fundit 3 Maj 2021, 15:02
Korporata Elektroenergjitike Shqiptare ka shënuar dhe dy raste të tjera me mungesë konkurrence. Sipas të dhënave në APP, pjesëmarrëse në dy tendera të zhvilluar së fundmi rezulton vetëm 1 subjekt që më pas është shpallur automatikisht edhe fituesi, pa asnjë konkurrent përballë.
Korporata Elektroenergjitike Shqiptare është paraqitur shpesh në media si një nga institucionet ku fituese shpallet oferta më e lartë, por edhe për tenderat pa garë.
Ky fenomen është konstatuar edhe në dy prokurimet e publikuara në buletinin e datës 26 prill që kapin vlerën e rreth 47 milionë lekëve.
Për blerjen, furnizimin dhe vendosjen e karikuesve elektrikë për automjetet në pikat e KESH-it, pjesëmarrëse rezulton vetëm bashkimi i operatorëve Tetra Solution dhe RSM shpk, i cili automatikisht ka arritur të sigurojë edhe kontratën.
Ky subjekt është shpallur fitues nga institucioni i cili drejtohej nga Benet Beci para se ai të votohej për mandatin e deputetit në zgjedhjet e 25 prillit, me ofertën e paraqitur prej 29 milionë e 65 mijë lekësh, thuajse e njëjtë me fondin limit prej 29.9 milionë lekësh.
E njëjta procedurë është ndjekur dhe për mirëmbajtjen e sistemit hidrometerologjik me fond limit 18 milionë lekë.
Sërish, konstatohet mungesë konkurrence, pasi i vetmi operator ekonomik që mori pjesë në garë rezulton 4 AM shpk.
Kjo ka bërë që kompania në fjalë, pa asnjë konkurrent përballë, të shpallet edhe fituesja me vlerën e ofruar 17.9 milionë lekë.
KESH e drejtuar nga Benet Beci vetëm në vitin e pandemisë ka dhënë të paktën 1.3 miliardë lekë tendera, shumica e të cilëve pa garë.
Pavarësisht se procedura të tilla janë kritikuar shpesh edhe nga institucionet ndërkombëtare, as nga KLSH as nga SPAK nuk ka nisur ende asnjë hetim.
