Drejt 25 prillit pa fletë votimi? Kompania sllovene: Me përmasat e reja, e pamundur ta realizojmë brenda afatit

Nga OraNews Përditësimi i fundit 4 Prill 2021, 13:08

Zvarritja e miratimit të fletës së votimit nga KQZ-ja dhe nga partitë politike mund të rrezikojnë zgjedhjet parlamentare të 25 prillit.

Kompania sllovene "Cetis", e cila ka fituar tenderin për rreth 3.6 milionë fletë votimi me anë të një letre drejtuar Komisionit Qendror të Zgjedhjeve ngre alarmin se koha e lënë në dipozicion është e pamjaftueshme për të prodhuar modelin me emra të miratuar nga Celibashi.

 “Duam tu vëmë në dijeni për disa limite në procesin e printimit që çdo kompani mund të përballet në një projekt të ngjashëm si ky i prodhimit të fletëve të votimit. Pasi ne kemi marrë të gjithë informacionin e nevojshëm për numrin e fletëve të votimit që do të duhet për qendrat e votimit, ne kemi bërë dizenjimin dhe formatin e tyre, përfshirë kohën që duhet për printimin final. Pas marrjes së konfirmimit, pasi ne të kemi dizenjuar fletën e votimit, do të na duhet kohë për të përgatitur e shkuar në printim sipas konfirmimit të marrë nga KQZ.

Zakonisht ky proces merr 1 deri në 2 ditë dhe varet nga disa faktorë të brendshëm. Printimi në vetvete i 3.6 milionë fletë votimi me përafërsi merr 14 ditë pune dhe vijimësia e procesit të printimit varet nga prodhimi. Ne mbërrijmë në konkluzionin se “fleta e votimit me përmasa të cilat ne kemi parë do të duhet për tu printuar më shumë se 20 ditë, në mënyrë të përfundojmë me sukses të gjithë numrin e kërkuar dhe në fund duhet ti shtojmë edhe dy ditë të tjera për ti dorëzuar këto në qendrat e votimit nga KQZ.

Përsa i përket fletës së votimit të Tiranës e cila është me e gjatë se formati A3 do të na duhet të porosisim letër të kësaj madhësie gje e cila kërkon 2 deri në 3 javë, përfshirë këtu dhe kohëzgjatjen në printim siç e shpjeguam më sipër. Një fletë votimi e të tilla përmasave do ta zvogëlonte printimin në kohë nga makineritë tona për një sërë arsyesh teknike dhe logjistike.

Të gjithë faktet që ne ju sjellim përmes kësaj letre tregojnë se fatkeqësisht suksesi dhe siguria në printim dhe dërgim të fletëve të votimit në harkun kohor të 10 ditëve, në periudhën 12-22 prill do të jetë një mision i pamundur” thuhet në letrën e kompanisë.

Pas këtij shqetësimit pritet edhe një reagim nga ana e KQZ-së, pasi një situatë e tillë mund ta gjejë vendin tonë me 25 prill pa fletë votimit.