Sulmi me bombë ndaj krerëve muxhahedinë, dënohet me 20 vjet burg diplomati iranian
Nga OraNews Përditësimi i fundit 4 Shkurt 2021, 15:58
Një diplomat iranian që planifikoi vrasjen e krerëve të muxhahedinëve është dënuar me 20 vite burg nga gjykata e Belgjikës. Planin e tij, Asadollah Asadi, e vuri në punë me disa bashkëpunëtorë të cilët u arrestuan tri vite më parë bashkë me të.
Një gjykatë belge dënoi të enjten me 20 vite burg diplomatin iranian, Asadollah Asadi, për planifikimin e një sulmi me bombë ndaj opozitës së vendit.
49-vjeçari u shpall fajtor për ngjarjen e 30 qershorit 2018 kur u bë pjesë e planit për të vrarë krerët muxhahedinë të Rezistencës Iraniane.
Sipas gjykatës, Asadi ishte me mision në Austri kur u siguroi eksplozivët tre personave të tjerë me dyshtetësi iraniane dhe belge, të cilët u dënuan po ashtu me 15 deri 18 vite burg.
"Është një vendim ekzemplar, i gjatë, i hollësishëm, që tregoi se diplomati nuk mund të bëjë ç'të dojë, ka imunitet për detyrën zyrtare, por jo kur kryen veprime kriminale dhe akte terroriste."
"Ishte vendim historik dhe konfirmim i pastër kundër terrorizmit shtetëror nga regjimi iranian, i cili për 40 vite merret në terrorizëm, dhe tani, për herë të parë, një diplomat i tij kapet në faj."
Në tubimin e 2018-ës merrnin pjesë zyrtarët e lartë të opozitës iraniane jashtë vendit, si edhe mbëshetës të huaj, si ish-avokati i presidentit amerikan.
Po atë ditë policia e zbuloi eksplozivin brenda një makine që drejtohej nga çifti i të akuzuarve.
Ndonëse qeveria franceze ia drejtoi përgjegjësinë shërbimeve informative iraniane, republika islamike e ka mohuar përfshirjen.
Opozita muxhahedine konsiderohet organizatë terroriste nga qeveria e Teheranit.
