Me borën vijnë edhe problemet e vjetra në Shqipëri
Nga OraNews Përditësimi i fundit 4 Janar 2021, 14:53
Reshjet e dëborës e shiut kanë shkaktuar probleme me qarkullimin në rrugë dhe energjinë elektrike në veri të vendit. Ndërsa në juglindje, bora mbushi sërish me pushues fshatrat turistik të Korçës.
Reshjet e dëborës dhe shiut kanë shkaktuar probleme në veri e verilindje.
Dëbora ka mbuluar fshatrat nga Razma deri në Vermosh .
Thethi mbetet gati izoluar për shkak se trashësia e dëborës arrin deri në një metër në disa zona.
Nga Qafë Thorë deri në brendësi të fshatit mund të lëvizin vetëm makinat e larta.
Boga prej gati një jave ka mungesë të energjisë elektrike, sikurse në Vermosh dhe Lëpushë.
Në qarkun e Kukësit reshjet e dëborës e shiut kanë shkaktuar rrëshqitje dherash e gurësh në rrugë.
Më problematike situata raportohet në aksin Bajram Curri -Valbonë, ndërsa akset kombëtare raportohen të kalueshëm.
Reshjet e dëborës u rikthyen në juglindje.
Me intensitet të lartë ishin në Dardhë, ku arritën deri në 20 cm trashësi, e gjatë natës rruga u bllokua.
Të hënën akset ishin të gjitha të kalueshme pa zinxhirë, çka bëri që shumë qytetarë ti drejtoheshin fshatrave turistikë të Korçës.
Në pjesën tjetër të vendit, pati reshje shiu e temperatura të ulëta.
