Tjetër tërmet godet Kroacinë
Nga OraNews Përditësimi i fundit 4 Janar 2021, 10:59
Mëngjesin e sotëm Petrinja e Kroacisë u godit nga një tjetër tërmet me magnitudë 4.2.
Tërmeti u regjistrua në orën 07:49, konfirmoi Shërbimi Sizmologjik i Kroacisë.
Lëkundjet e tokës u ndjenë në një zonë më të gjerë të vendit, përfshirë edhe Slloveninë.
Petrinja ishte qyteti më pranë epiqendrës së tërmetit shkatërrimtar të 29 dhjetorit me fuqi 6.3 sipas shkallës Richter.
Ai tërmet u ndje në kryeqytetin kroat, Zagreb, në Bosnje e Hercegovinë dhe Serbi e deri në Itali. Në Petrinja, situata ishte shumë serioze dhe pikërisht ky qytet u godit sërish nga tërmeti i mëngjesit të sotëm, i cili ishte më i lehtë, por ngjalli panik në një zonë të traumatizuar tashmë.
Presidenti i Kroacisë, Zoran Millanoviq, është shprehur më parë se do të duhen fonde të mëdha për të rindërtuar qytetin e Petrinjës, ndërsa krahasoi fuqinë e tërmetit të 29 dhjetorit me 7 viktima e dhjetëra të plagosur, me atë të vitit të kaluar në Durrës.
