Policët shpërblim "me mik", Shqipëria e fundit në rajon për pagat
Nga OraNews Përditësimi i fundit 22 Dhjetor 2020, 17:28
Një numër i madh efektivësh të policisë janë përjashtuar nga shpërblimi i fundvitit i miratuar nga Drejtoria e Përgjithshme e Policisë së Shtetit, me motivacionin se kanë marrë vërejtje dhe kanë masa disiplinore.
Ky veprim sipas Sindikatës së Punonjësve të Policisë është selektiv dhe lë mundësi abuzimi nga drejtuesit e komisariateve në hartimin e listave me efektivët përfitues.
“Listat bëhen në mënyrë selective dhe duke marrë parasysh edhe prioritetet që kanë drejtuesit ndaj vartësve të tyre, nëse gjatë gjithë vitit ka pasur marrëdhënie të mira apo jo. Kjo nesër e penalizon edhe punonjësin e policisë që nesër të përfitojë nga ky shpërblim.”
Sipas Sadetin Fishtës shpërblimet selektive ndikojnë në uljen e performancës së punës tek efektivët gjatë kryerjes së detyrave në kushtet kur gjatë vitit kanë pasur angazhime shtesë nga pandemia dhe protestat.
“Ky lloj shpërblimi krijon ulje të performancës te policët. Pakënaqësitë lindin vetëvetiu sepse të gjithë bëjnë të njëjtën punë, të gjithë janë për të njëjtin qëllim dhe bëjnë të njëjtën detyrë. Kur vjen pun ate shpërblimi bëhen diferencime.”
Një tjetër problematikë janë pagat e ulëta të efektivëve ku Shqipëria renditet e fundit në rajon.
“Është mbrapa Kosovës, Maqedonisë, Malit të Zi dhe me diferenca ndoshta jo shumë të mëdha, por gjithmonë ne jemi të fundit në paga.”
Efektivët presin të marrin zgjidhje nga qeveria edhe për sigurimin e jetës, kreditë e buta, trajtimin me ushqim gjatë ushtrimit të detyës, apo afrimi me shërbim pranë vendbanimeve.
