Starton në fundjavë Kategoria e Parë dhe e Dytë. Vendimi për Superioren, të premten
Nga OraNews Përditësimi i fundit 28 Tetor 2020, 11:02
Federata Shqiptare e Futbollit bën me dije se këtë fundjavë do të nisë edicioni i ri futbollistik 2020/2021 në Kategorinë e Parë, Kategorinë e Dytë dhe në të gjitha nivelet e moshave.
Sektori i Garave në FSHF i ka nisur njoftimet klubeve dhe po kryen përgatitjen e nevojshme për këtë rifillim.
Sa i përket Kategorisë Superiore, ashtu siç është njoftuar edhe nga Liga Profesioniste e Futbollit, vendimi do të merret në mbledhjen që presidentët e klubeve do të zhvillojnë sipas programit ditën e premte.
Liga Profesioniste e Futbollit ka publikuar javë më parë 4 kërkesat drejtuar qeverisë, të cilat janë të argumentuara në 12 faqe.
Katër kërkesat e Ligës janë:
- Ndryshime në ligjin për sponsorizimet duke aplikuar sistemin e zbritjes nga tatim fitimi, pasi varianti aktual nuk është atraktiv për sponsorat, ç’ka e vërteton edhe realiteti i deritanishëm.
- Përfshirjen e futbollit në TVSH-në e reduktuar me 6%
- Faljen e gjobave dhe kamatvonesave
- Zgjatjen e periudhës së përjashtimit nga tatim-fitimi mbi të ardhurat e futbollistëve nga 2-10 vite.
