Oficerët e BKH-së, testi fizik skarcon kandidatët, kalojnë vetëm 103
Nga OraNews Përditësimi i fundit 24 Tetor 2020, 13:09
103 kandidatë kanë arritur të kalojnë testin e aftësive fizike në garën për oficerë të policisë gjyqësore në Byronë Kombëtare të Hetimit nga 424 që ju futën këtij testimi.
Në 23 tetor u mbyll faza e tretë e vlerësimit të kandidatëve, të cilët do të kalojnë në filtrat e tjerë, që janë testi i inteligjencës dhe poligrafi.
Në fazën e parë, kandidatët u vlerësuan në bazë të dokumentacionit të paraqitur, ndërsa në fazën e dytë kandidatët do ti nënshtrohen testimit me shkrim ku arritën të skualifikoheshin 424 persona.
Por për të zgjedhur 60 emrat më të mirë që do të jenë pjesë e FBI-së shqiptare, kandidatët do të kalojnë dhe në faza të tjera vlerësimi.
Pas testimit për shkrimin e eseve ditën e hënë, kandidatët do të vlerësohen për pasurinë.
Ata do ti nënshtrohen një vettingu ku do të deklarojnë çdo pasuri që kanë ata dhe të afërmit e tyre.
Pas kësaj, kandidatët do të përzgjidhen dhe do ti nënshtrohen testimit të poligrafit ose makina e të vërtetës.
Në përfundim për BKH do të përzgjidhen 60 oficerë, të cilët do të dërgohen në Amerikë për trajnim.
Në lidhje me garën për përzgjedhjen e kandidatëve ka reaguar edhe Ambasada amerikane.
Në një postim në rrjetet sociale, Ambasada ka përshëndetur kandidatët që kanë kaluar në raundin tjetër të procesit të përzgjedhjes.
