Lituani-Shqipëri, Reja: Kombëtarja ka fituar 10 futbollistë të rinj
Nga OraNews Përditësimi i fundit 13 Tetor 2020, 19:29
Trajneri i Kombëtares shqiptare, Edi Reja, në konferencën për shtyp para sfidës me Lituaninë është shprehur se performanca e ekipit baltik në ndeshjen e parë në “Air Albania” ka qenë shumë e mirë.
“Kanë ushtruar presing të vazhdueshëm duke i hequr iniciativën ekipin tonë”, është shprehur italiani.
“Presingu në rritje dhe gabimet tona individuale shkaktuan pësimin e golit. Gjithsesi jemi të vetëdijshëm se është një ekip me aftësi të larta teknike dhe do të mundohet që të njëjtë gjë ta ushtrojë dhe nëse.
Do të përpiqemi që të gjejmë pikat më të dobëta të tyre duke ushtruar presionin tonë dhe duke shfrytëzuar anët tona më të forta, për të arritur në objektivin tonë që është fitorja e ndeshjes”, vijoi Reja.
Sipas teknikut të kuqezinjëve, ekipi ka fituar 10 lojtarë të rinj që e meritojnë grumbullimin me Kombëtaren.
“Ekipi aktualisht ka 10 lojtarë të fituar, 10 lojtarë të rinj, 10 emra që janë ndjekur ngushtë nga stafi teknik dhe e meritojnë këtë grumbullim. Lojtarë të cilët kanë potenciale dhe aftësi shumë të mira. Eksperienca nuk janë vitet. Pasioni dhe kualitetet mund të shprehen edhe në moshën 20 vjeç, është çështje besimi dhe se sa ti dëshiron të japësh në fushë.
FSHF ka një program për të futur brezat e rinj si pjesë integrale e Kombëtares. Unë kam menduar ta bëja këtë hap mbas hapi, por kushtet më sollën që të merrja një numër kaq të lartë lojtarësh të rinj”, deklaroi Edi Reja.
Lituani-Shqipëri luhet nesër, në ora 18.00.
