Protesta antiqeveritare në Serbi del jashtë kontrollit/ Përplasje me forcat e rendit pranë presidencës
Nga OraNews Përditësimi i fundit 24 Maj 2026, 09:09
Në Beograd janë regjistruar incidente pranë pallatit presidencial pas përfundimit të një proteste të organizuar nga studentët.
Pas tubimit, një grup protestuesish u përpoq t’i afrohej zonës ku ndodheshin kampet e mbështetësve të presidentit Aleksandar Vučić.
Policia ndërhyri për t’i ndaluar, duke i shtyrë prapa dhe duke përdorur mjete për shpërndarjen e turmës, pasi disa persona hodhën objekte drejt forcave të rendit.
Situata u qetësua pak para mesnatës, ndërsa protestuesit u shpërndanë. Megjithatë, forca të shumta policore mbetën në zonë për të mbajtur nën kontroll situatën.
Protesta e studentëve gjatë ditës ishte një nga më të mëdhatë e muajve të fundit në Beograd. Ata kërkojnë zgjedhje të parakohshme dhe ndryshime politike, duke ngritur shqetësime për korrupsionin dhe mungesën e transparencës.
Lëvizja studentore në Serbi ka nisur pas një tragjedie në Novi Sad në fund të vitit 2024, ku shembja e një strukture në stacionin hekurudhor shkaktoi vdekjen e 16 personave.
