Man.City për Guardiolën: një statujë dhe një tribunë do të mbajë emrin e tij në Etihad!...
Nga OraNews Përditësimi i fundit 23 Maj 2026, 14:58
Manchester City po i bën një homazh të dyfishtë Pep Guardiolës, i cili po largohet nga klubi pas 10 vitesh. City ka njoftuar se tribuna veriore e rinovuar dhe e zgjeruar në stadiumin Etihad do të riemërtohet ‘Tribuna Pep Guardiola’.
Ndërkohë një statujë do të ngrihet gjithashtu në nder të trajnerit spanjol, e cila do të vendoset përgjatë rrugës hyrëse për në tribunën e Guardiolës.
"Ai la një gjurmë të pashlyeshme në ADN-në e klubit", tha Sheikh Mansour. "Një gjurmë që vjen më shumë nga mënyra se si fitoi, sesa nga trofetë e shumtë që ngriti. Ai do të ketë mirënjohjen time të pafundme dhe atë të të gjithë familjes City, një familje pjesë e së cilës do të jetë gjithmonë".
Tribuna Guardiola do të hapet plotësisht për ndeshjen e fundit të trajnerit në krye të klubit, ndeshjen e së dielës kundër Aston Villas.
