“Shqipëria rrezikon “trenin” e Europës”/ Kapri: Eurodeputetët “të skandalizuar” nga parlamenti shqiptar

Nga OraNews Përditësimi i fundit 20 Maj 2026, 21:12

Brukseli nuk ka pasur kurrë një klimë më pozitive dhe një dëshirë më të jashtëzakonshme për të afruar Shqipërinë drejt anëtarësimit në Bashkimin Europian.

Megjithatë, ky moment historik rrezikon të humbasë për shkak të një pengese madhore: mungesës së vullnetit politik për të mbështetur pa kompromis luftën kundër korrupsionit dhe sistemin e drejtësisë.

Topi tashmë është në fushën e Tiranës, ndërsa zyrtarët e lartë europianë dhe eurodeputetët kanë ngritur alarmin për atë që e konsiderojnë një vijë të kuqe të pakalueshme.

Deputeti Partisë Mundësia, Erlad Kapri, në një lidhje direkte nga Strasburgu në studion e emisionit “Ora e Betit” në “Ora News” të moderuar nga gazetarja Beti Njuma, u shpreh se nga takimet e zhvilluara, shqetësimi kryesor i partnerëve europianë lidhet me çështjet e drejtësisë.

Pika që ka ndezur kambanat e alarmit ishte refuzimi i Kuvendit të Shqipërisë për t'i hapur rrugë kërkesës së SPAK për heqjen e imunitetit të ministres Belinda Balluku.

Ky vendim, tha Kapri, është parë në Bruksel si një “shans i humbur” dhe ka lënë një shije të hidhur, duke ngritur dyshime serioze mbi sinqeritetin e qeverisë shqiptare në luftën kundër korrupsionit.

Po ashtu, deputeti Kapri u shpreh se mesazhi nga BE-ja është i prerë: mbështetja për SPAK duhet të jetë totale dhe pa asnjë lloj kufizimi. Kërkesa për një drejtësi të pavarur, që nuk ndikohet nga politika dhe që bën detyrën e saj pa hezitim, është thelbësore dhe e panegociueshme.

Një pjesë e eurodeputetëve, raportoi Kapri, janë “të skandalizuar” nga vendimi i parlamentit, i cili shihet si një sfidë direkte ndaj parimeve bazë të shtetit ligjor.

Ndërsa Shqipëria heziton, fqinjët e saj po ecin përpara me shpejtësi. Mali i Zi pritet të bëhet anëtar me të drejta të plota në vitin 2028, një fakt që cilësohet nga Kapri, si një “moment turpi” për politikën shqiptare. Mali i Zi, i cili shpalli pavarësinë në vitin 2006, kur Shqipëria nënshkruante Marrëveshjen e Stabilizim-Asociimit, po e lë pas Shqipërinë në procesin integrues.

Në këtë kontekst, Kapri u shpreh se humbja e “trenit” aktual të integrimit do të ishte e pafalshme. Dashamirësia dhe mbështetja politike ekzistuese në Bruksel, e nxitur edhe nga situata e re gjeopolitike, përbën një dritare mundësie që mund të mos përsëritet. Fati i rrugëtimit europian të Shqipërisë tani varet tërësisht nga aftësia e politikës vendase për të dëshmuar me vepra, dhe jo vetëm me fjalë, se lufta ndaj korrupsionit dhe mbështetja për drejtësinë janë prioritete absolute.

NDIQNI EMISIONIN E PLOTË “ORA E BETIT” NË “ORA NEWS”