Hantavirus në anijen turistike/ OBSH dhe ekspertët: Situata nën kontroll, pa rrezik për popullatën
Nga OraNews Përditësimi i fundit 9 Maj 2026, 08:27
Një rast me hantavirus është raportuar në anijen turistike holandeze MV Hondius, duke shkaktuar shqetësim në disa media ndërkombëtare.
Rasti lidhet me virusin e Andeve, një nga llojet e rralla të hantavirusit që në disa situata të veçanta mund të transmetohet nga njeriu te njeriu, por vetëm në kontakt shumë të ngushtë.
Megjithatë, ekspertët shëndetësorë dhe institucionet ndërkombëtare si Qendra Evropiane për Parandalimin dhe Kontrollin e Sëmundjeve dhe Organizata Botërore e Shëndetësisë kanë bërë të ditur se situata është nën monitorim dhe nuk ka arsye për panik.
Sipas tyre, rreziku për përhapje në popullatë mbetet shumë i ulët dhe nuk flitet për rrezik pandemie.
Epidemiologu grek Gikas Mayorkinis ka shpjeguar se transmetimi nga njeriu te njeriu është shumë i rrallë dhe ndodh vetëm në kushte të afërta dhe të zgjatura.
Ai ka shtuar se nuk ka rrezik të përhapjes jashtë anijes.
Sipas të dhënave, hantaviruset zakonisht përhapen përmes brejtësve dhe jo nga kontakti mes njerëzve.
Në Evropë, rastet janë zakonisht më të lehta, ndërsa në Amerikën e Jugut disa forma të virusit mund të shkaktojnë sëmundje më të rënda.
Aktualisht nuk ekziston vaksinë apo trajtim specifik për këtë virus, ndërsa pacientët trajtohen me kujdes mjekësor mbështetës. Simptomat mund të shfaqen disa javë pas ekspozimit dhe përfshijnë ethe, lodhje dhe probleme me frymëmarrjen.
Autoritetet shëndetësore këshillojnë kujdes të shtuar në kontakt me brejtësit dhe ruajtjen e higjienës, sidomos në ambiente të mbyllura ose zona rurale.
