ZGJEDHJET, “DUEL” KURTI- OSMANI/ Kurti hyn me koalicion, Osmani bashkëpunim më LDK-në
Nga Lili Saraçi Përditësimi i fundit 8 Maj 2026, 15:28
Albin Kurti dhe Vjosa Osmani pritet të përballen politikisht në zgjedhjet e 7 qershorit. LDK-ja ka zyrtarizuar Vjosa Osmanin si kryesuese liste dhe kandidate për presidente, ndërsa Abdixhiku do të garojë për kryeministër. Në zgjedhje do të marrin pjesë 22 parti dhe 3 koalicione. Jashtë garës ka mbetur Nisma Socialdemokrate e Fatmir Limajt.
Kosova po hyn në një tjetër përballje të fortë politike, ndërsa zgjedhjet parlamentare të 7 qershorit pritet të sjellin një duel të drejtpërdrejtë mes Albin Kurtit dhe Vjosa Osmanit.
Lidhja Demokratike e Kosovës ka zyrtarizuar marrëveshjen politike me presidenten aktuale Vjosa Osmani, e cila do të jetë kryesuese e listës zgjedhore të LDK-së dhe njëkohësisht kandidate për presidente të vendit pas zgjedhjeve.
Ndërkohë, kryetari i LDK-së Lumir Abdixhiku do të garojë si kandidat për kryeministër dhe do të mbajë numrin dy në listë.
Zyrtarë të LDK-së thanë se ky bashkëpunim synon rikthimin e figurave të larguara nga partia dhe krijimin e një alternative të re politike përballë Lëvizjes Vetëvendosje.
Në anën tjetër, kryeministri në detyrë Albin Kurti do të hyjë në zgjedhje me koalicionin aktual të Vetëvendosjes, Guxo, Alternativa dhe Partia Shqiptare Demokristiane, duke synuar një mandat të ri qeverisës.
Kështu, zgjedhjet e 7 qershorit pritet të dominohen nga rivaliteti politik mes Kurtit dhe Osmanit, dy figurave që dikur ndanin të njëjtin pushtet institucional, por që tashmë pritet të jenë kundërshtarë direkt në garën për drejtimin e vendit.
Komisioni Qendror i Zgjedhjeve ka konfirmuar se në këto zgjedhje do të marrin pjesë 22 parti politike dhe 3 koalicione. Në garë do të jenë edhe PDK-ja, AAK-ja, PSD-ja e Dardan Molliqajt, si dhe subjektet e komuniteteve joshumicë.
Jashtë zgjedhjeve ka mbetur Nisma Socialdemokrate e Fatmir Limajt, e cila nuk është regjistruar si subjekt garues. Edhe Aleanca Kosova e Re e Behgjet Pacollit nuk do të marrë pjesë si parti më vete.
Zgjedhjet e 7 qershorit konsiderohen ndër më të rëndësishmet e viteve të fundit, pasi pritet të përcaktojnë jo vetëm qeverinë e ardhshme, por edhe presidentin e ri të Kosovës.
