PAMJET/ Ish-Kinostudioja “Shqipëria e Re” frymëzon piktorët e vegjël
Nga OraNews Përditësimi i fundit 29 Mars 2026, 13:40
Godina historike e ish-Kinostudios “Shqipëria e Re”, sot seli e Ministrisë së Turizmit, Kulturës dhe Sportit, u kthye në një hapësirë frymëzimi artistik për fëmijët e Kolonisë së Piktorëve të Vegjël të Qendrës Kombëtare të Kulturës për Fëmijë.
Ministri i Turizmit, Kulturës dhe Sportit, Blendi Gonxhja ndau foto nga aktiviteti, ku fëmijët kanë hedhur në telajo këndvështrimet e tyre kreative mbi këtë godinë me vlerë historike dhe kulturore.
Përmes ngjyrave dhe imagjinatës, të vegjlit sollën një interpretim të veçantë të një prej simboleve të kinematografisë shqiptare, duke e parë atë jo vetëm si një ndërtesë institucionale, por si një pjesë të gjallë të trashëgimisë kulturore të vendit.
Ky aktivitet synon të nxisë krijimtarinë artistike tek fëmijët, si edhe të forcojë lidhjen e brezit të ri me historinë dhe identitetin kulturor shqiptar, duke i afruar ata më pranë institucioneve dhe hapësirave që mbartin vlera të rëndësishme kombëtare.
