Tragjedi në Parco degli Acquedotti/ Shpërthimi në ndërtesën e braktisur lë dy viktima
Nga OraNews Përditësimi i fundit 20 Mars 2026, 17:58
Një ngjarje e rëndë ka ndodhur në Parco degli Acquedotti, ku dy persona janë gjetur të pajetë brenda një ndërtese të braktisur që u shemb pas një shpërthimi.
Viktimat janë identifikuar si Alessandro Mercogliano dhe Sara Ardizzone. Sipas informacioneve paraprake, ata ndodheshin në godinën e njohur si “Casale del Sellaretto”, e cila u rrëzua pas shpërthimit të ndodhur mbrëmjen e 19 marsit.
Nga të dhënat e para, dyshohet se të dy mund të kenë qenë duke përgatitur një mjet shpërthyes. Burri kishte pësuar djegie të rënda, ndërsa gruaja kishte marrë plagë nga shembja e strukturës.
Ngjarja u zbulua mëngjesin e 20 marsit nga një kalimtar, ndërsa banorët e zonës kishin raportuar një shpërthim të fortë gjatë natës. Godina e vjetër ishte e braktisur prej kohësh dhe përdorej nga persona të pastrehë.
Në vendngjarje ndërhynë policia, zjarrfikësit dhe ekipet mjeko-ligjore, ndërsa hetimet po kryhen nga autoritetet lokale në Romë.
Sipas burimeve, dy viktimat dyshohet se kishin lidhje me rrethin e Alfredo Cospito, një element që po merret në konsideratë nga hetuesit për zbardhjen e plotë të ngjarjes.
