Sfidat e Turizmit, Rama zbret në Vlorë

Nga OraNews Përditësimi i fundit 16 Mars 2026, 14:34

Kryeministri Edi Rama qëndroi këtë të hënë në Vlorë ku pati një takim me një pjesë të deputetëve të qarkut, drejtues të pushtetit vendor dhe partisë Socialiste.

Kreu i mazhorancës u prit nga Ministrja e Shtetit për Marrëdhëniet me Parlamentin, Erjona Ismaili, e cila njëherësh është edhe deputete e Vlorës, por edhe bashkëkryetare e PS atje.

E pranishme Brunilda Mersini në cilësinë e kryebashkiakes dhe disa drejtues të tjerë vendore,  por ra në sy mungesa e Bledi Çuçit, si drejtues politik I PS për qarkun.

Në qendër të takimit që zgjati për gati njëorë mësohet ishin projektet që po zhvillohen jo vetëm në Bashkinë e Vlorës, por në të gjithë qarkun, teksa është kërkuar koordinim mes pushtetit vendor dhe institucioneve qendrore për përfundimin në kohë të projekteve.

Kryeministri mësohet se është ndalur edhe tek sezoni i ri turistik, ku ka kërkuar vëmendje të shtuar, si dhe nevojën për masa konkrete që lidhen me menaxhimin e hapësirave publike, përmirësimin e shërbimeve dhe garantimin e standardeve të pritjes për turistët.

Rama ka theksuar se Vlorës i është kushtuar një vëmendje e veçantë vitet e fundit përmes investimeve në infrastrukturë, turizëm dhe zhvillim urban.

Ai nënvizoi se këto projekte kanë ndikim të drejtpërdrejtë në rritjen e potencialit turistik të qytetit dhe në përmirësimin e shërbimeve për qytetarët dhe vizitorët.

Kryeministri është shprehur se përgatitja në kohë e infrastrukturës dhe e shërbimeve është thelbësore për të përballuar fluksin e vizitorëve që pritet gjatë muajve të verës në Vlorë dhe në zonat përreth.

Koordinim dhe bashkëpunim me Bashkinë u kërkua edhe në takimet e zhvilluara në selinë qendrore të PS në Tiranë.

Takimet vijnë edhe në kuadër të riorganizimit të Partisë Socialiste, për çka është thirrur edhe mbledhja e Asamblesë së Përgjithshme, që do të mbahet më 21 mars në Durrës.