BETEJA PËR PAPA LEON XIV/ Detaje tronditëse nga konklava që zgjodhi Papën amerikan
Nga Lili Saraçi Përditësimi i fundit 1 Mars 2026, 13:25
Një libër i ri hedh dritë mbi prapaskenat dramatike të konklavës së vitit 2025, ku u zgjodh Papa Leo XIV, papa i parë amerikan në historinë e Kishës Katolike. Autorët zbulojnë betejat e ashpra mes kardinalëve, rënien e kandidatëve favoritë dhe mënyrën si Kardinali Robert Prevost arriti të fitojë mbështetjen vendimtare në raundin e katërt të votimit.
Konklava që zgjodhi Papën e ri në maj të vitit 2025 ishte po aq dramatike sa një film hollivudian, por kësaj here, gjithçka ishte reale.
Sipas librit të ri “Zgjedhja e Papa Leo XIV: Surpriza e Fundit e Papa Françeskut”, i shkruar nga gazetari i Vatikanit Gerard O'Connell dhe korrespondentja argjentinase Elisabetta Piqué, zgjedhja e Papa Leo XIV ishte rezultat i një gare të fortë, me kthesa të papritura.
Në votimin e parë, më i votuari ishte kardinali hungarez Péter Erdő, përfaqësues i krahut konservator. Por mbështetja për të nisi të zbehej në raundet pasuese.
Në garë ishin edhe Sekretari i Shtetit të Vatikanit, Pietro Parolin, si dhe kardinali filipinas Luis Antonio Tagle. Parolin shihej si favorit, por një fjalim kritik ndaj reformave të paraardhësit dhe mungesa e karizmës në një meshë me të rinj ndikuan negativisht në kandidaturën e tij. Ndërsa Tagle, megjithëse shumë popullor, u konsiderua jo mjaftueshëm i fortë në administrim.
Ndërkohë, Kardinali Robert Prevost një augustinian nga Çikago me përvojë misionare në Peru fitoi në heshtje mbështetjen e më shumë se njëzet kardinalëve. Ai shihej si një figurë e përulur, me përvojë ndërkombëtare dhe si vazhdues i trashëgimisë së Papa Françesku.
Në votimin e katërt, Prevost u zgjodh me 108 vota, duke u bërë papa i parë i lindur në Shtetet e Bashkuara në historinë dymijëvjeçare të Kishës.
Libri zbulon edhe momente njerëzore brenda konklavës në Kapela Sistine: një telefon celular i harruar në xhep, votime të përsëritura për shkak të një gabimi teknik dhe madje ankesa për mungesë tualetesh.
Sipas autorëve, Papa Françesku kishte përgatitur terrenin për pasardhësin e tij duke e promovuar Prevostin në poste kyçe në Vatikan një strategji e heshtur që përfundimisht prodhoi surprizën më të madhe të konklavës.
Një proces i lashtë, i mbështjellë me rituale dhe sekret, arriti edhe një herë të surprizojë botën duke zgjedhur një papë amerikan aty ku shumëkush mendonte se kjo ishte e pamundur.
