Doçi: Protestat e zhvilluara janë pasqyra e asaj që po ndodh në Shqipëri
Nga Sonila Musai Përditësimi i fundit 15 Shkurt 2026, 16:08
Opozita po intensifikon aksionin e saj me një seri protestash më të shpeshta dhe të qëndrueshme, duke kulmuar me thirrjen për pjesëmarrje masive më 20 shkurt. Mariglen Doçi përfaqësues i Partisë Demokratike, ka zbuluar strategjinë e opozitës duke hedhur akuza të rënda ndaj qeverisë për përdorimin e policëve civilë si provokatorë për të inskenuar dhunë.
Sipas përfaqësuesit të opozitës, gjatë protestave të mëparshme janë vërejtur individë të veshur civilë, të cilët veprojnë si të dehur për të provokuar përplasje me forcat e rendit. Ai pretendon se këta persona, të cilët dyshohet se janë efektivë policie, pas inskenimit të incidenteve gjejnë strehë pas kordoneve policore.
"Kjo strategji synon të njollosë imazhin e protestave paqësore, të cilat përshkruhen si pjesë e një “revolucioni paqësor” që synon largimin e qeverisë aktuale."
Duke theksuar se Partia Demokratike nuk ka orkestruar kurrë akte dhune, ai bëri thirrje për një front të përbashkët opozitar. Sipas tij, protestat e fragmentuara vetëm sa i shërbejnë zgjatjes së pushtetit të kryeministrit Edi Rama.
Për këtë arsye, ai thekson nevojën e bashkimit të të gjitha forcave opozitare nën udhëheqjen e Partisë Demokratike, si forca kryesore politike që përfaqëson shumicën e elektoratit opozitar.
Kërkesa kryesore e opozitës mbetet krijimi i një qeverie teknike, e cila do të garantonte kushte për zgjedhje të lira dhe të ndershme, pa ndikimin e strukturave shtetërore apo partisë në pushtet. Kjo kërkesë vjen në një kohë kur skena politike është tronditur nga afera korruptive.
NDIQNI INTERVISTËN E PLOTË:
