Tifozët në Arabinë Saudite tallen me një njoftim për Ronaldon: Po kërkojmë një person të zhdukur, ka probleme me të qarat
Nga OraNews Përditësimi i fundit 4 Shkurt 2026, 16:50
Një njoftim i pazakontë, i përgatitur si “njoftim për person të zhdukur” për Cristiano Ronaldon, është shndërruar në temë të nxehtë diskutimi në Arabinë Saudite dhe në rrjetet sociale.
Në imazhin që po qarkullon gjerësisht, shihet një poster me frazë tallëse: “Po e kërkojmë këtë burrë 40-vjeçar me probleme të forta me të qarat”, duke shkaktuar reagime të shumta dhe të ndara në opinionin publik.
Autenticiteti i njoftimit mbetet i paqartë. Disa përdorues e shohin atë thjesht si humor apo satirë sportive, ndërsa të tjerë e konsiderojnë një mungesë të hapur respekti ndaj yllit portugez, i cili prej disa vitesh është një nga figurat më të rëndësishme të futbollit saudit.
Imazhet, që pretendohet se janë postuar në mure në zona të ndryshme, shoqërohen me kontekstin e polemikave të fundit që kanë përfshirë Ronaldon, sidomos pas reagimeve të tij emocionale në disa ndeshje.
Pikërisht këto episode duket se janë shfrytëzuar për të ndërtuar mesazhin provokues ndaj “CR7”.
Postimi u bë viral brenda pak orësh dhe u interpretua nga shumëkush si një goditje direkte ndaj Ronaldos, i cili aktualisht luan për Al-Nassr dhe mban një status të veçantë në Arabinë Saudite, jo vetëm për kontributin sportiv, por edhe si ambasador i imazhit ndërkombëtar dhe turistik të vendit.
Pavarësisht polemikave, kjo “reklamë” apo njoftim i diskutueshëm e ka arritur qëllimin kryesor: të tërheqë vëmendje, të krijojë debat dhe ta rikthejë edhe një herë Cristiano Ronaldon në qendër të diskutimeve publike.
