Philadelphia triumfon në LA, Houston dhe Memphis vijojnë serinë e fitoreve
Nga OraNews Përditësimi i fundit 3 Shkurt 2026, 13:02
Philadelphia arriti një fitore të rëndësishme në transfertë ndaj Los Angeles Clippers me rezultatin 113-128, falë një paraqitjeje shumë të fortë të Dominick Barlow. Qendra e Philadelphia realizoi 26 pikë dhe 16 ribaunde, duke dominuar në zonën e koshit dhe duke i dhënë ritëm lojës së skuadrës së tij.
Tyrese Maxey ishte realizuesi më i mirë i ndeshjes për Philadelphia me 29 pikë dhe gjashtë asist, ndërsa Joel Embiid kontribuoi me 24 pikë.
Për Clippers, Kawhi Leonard udhëhoqi skuadrën me 29 pikë, por mungesa e James Harden ndikoi ndjeshëm në organizimin ofensiv të ekipit vendas.
Në një tjetër sfidë, Houston Rockets fituan 118-114 ndaj Indiana Pacers, të udhëhequr nga një ndeshje e jashtëzakonshme e Alperen Sengun, i cili realizoi 39 pikë dhe 16 ribaunde.
Fitorja erdhi në një moment kur skuadra ishte pa Kevin Durant, i cili është i dëmtuar në kyçin e këmbës. Jabari Smith Jr. shtoi 19 pikë, ndërsa Amen Thompson realizoi 16 pikë.
Me këtë sukses, Houston regjistroi fitoren e tretë radhazi dhe ruajti vendin e katërt në Konferencën Perëndimore.
Memphis Grizzlies mposhtën Minnesota Timberwolves 137-128, duke ndërprerë serinë prej katër fitoresh të kundërshtarëve.
Memphis, që vinte pas gjashtë humbjeve radhazi dhe pa të dëmtuarin Ja Morant, u mbështet te Jaren Jackson Jr., autor i 30 pikëve.
Shtatë lojtarë të Memphis përfunduan ndeshjen me pikë dyshifrore. Për Minnesota u dalluan Anthony Edwards me 39 pikë dhe Jaden McDaniels me 29.
Charlotte Hornets fituan 102-95 ndaj New Orleans Pelicans dhe u afruan me zonën playoff. LaMelo Ball realizoi 24 pikë, tetë ribaunde dhe pesë asist. Charlotte ka tashmë bilanc 23 fitore dhe 28 humbje, vetëm një vend pas Atlanta në Konferencën Lindore.
