SCHEFFLER SHKRUAN HISTORI/ Numri një i botës fiton turneun e 20-të në PGA Tour
Nga Andi Kurti Përditësimi i fundit 27 Janar 2026, 13:59
Scottie Scheffler ka nisur sezonin në mënyrë imponuese duke fituar turneun American Express në Kaliforni. Me këtë triumf, ai arriti fitoren e 20-të në PGA Tour në karrierë. Rezultati e vendos atë në një nivel historik krahas legjendave Tiger Woods dhe Jack Nicklaus.
Golfisti numër një në botë, Scottie Scheffler, ka regjistruar një tjetër sukses madhor në karrierën e tij, duke fituar turneun American Express në Kaliforni dhe duke shënuar triumfin e 20-të në PGA Tour.
Amerikani e mbylli turneun me rezultatin 27 nën par, katër goditje përpara ndjekësve të tij më të afërt, duke konfirmuar formën e shkëlqyer që në fillim të sezonit të ri.
Me këtë fitore, Scheffler bëhet lojtari i dytë më i shpejtë në histori që arrin 20 fitore nga suksesi i parë, pas Tiger Woods.
Ai është gjithashtu i treti më i shpejtë për nga numri i turneve të luajtura dhe i treti më i ri në moshë që e arrin këtë shifër, pas Woods dhe Jack Nicklaus.
29-vjeçari hyn në një klub shumë të ngushtë, duke qenë një nga vetëm tre lojtarët që kanë fituar 20 turne në PGA Tour dhe katër turne madhorë para moshës 30-vjeçare.
Përveç kësaj, ai ka kaluar shifrën e 100 milionë dollarëve të fituar në PGA Tour, një tjetër rekord që e vendos përkrah Woods dhe Rory McIlroy.
Në raundin final, Scheffler realizoi shtatë pikë, duke u shkëputur nga grupi i ndjekësve, edhe pse një gabim në gropën e 17-të i mohoi mundësinë për të thyer rekordin e turneut me 30 nën par. Ai la pas amerikanët Ryan Gerard, Matt McCarty dhe Andrew Putnam, si dhe australianin Jason Day.
Pas ndeshjes, Scheffler u shpreh se fokusi i tij mbetet te përgatitja dhe vazhdimësia, duke theksuar se synon të ruajë këtë ritëm edhe në turnetë e ardhshme.
Performanca e tij konfirmon se krahasimet me Tiger Woods dhe Jack Nicklaus nuk janë më vetëm simbolike, por gjithnjë e më reale në statistika dhe rezultate.
