PD-ja mbledh grupin parlamentar, takimi para nisjes së sesionit të ri të Kuvendit
Nga OraNews Përditësimi i fundit 15 Janar 2026, 13:20
Gazetari Isa Myzyraj raportoi për "Ora News" se Partia Demokratike pritet të mblidhet në kuadër të nisjes së sesionit të ri parlamentar, i cili do të çelet zyrtarisht të hënën, më 19 janar, në orën 17:00. Sipas tij, në rendin e ditës së mbledhjes është parashikuar vetëm fjala e kryetarit të grupit parlamentar, pa hapur diskutime.
Myzyraj bëri me dije se ditën e enjte pritet të zhvillohet seanca e radhës plenare e Kuvendit. Ndërkohë, gjatë ditës së sotme, Partia Demokratike pritet të përcaktojë agjendën e saj politike për sesionin e ri parlamentar, i cili përfundon në korrik të këtij viti.
Sipas gazetarit të Ora News, PD-ja pritet të marrë vendime edhe për çështje të rëndësishme, si pjesëmarrja në Komisionet e Posaçme Parlamentare, konkretisht në Komisionin e Reformës Zgjedhore dhe atë të Reformës Territoriale. Këto komisione duhet të përmbyllin punën brenda vitit 2026, në përputhje me projekt-planin strategjik dhe planin e veprimit të Kuvendit, dokumente që u janë shpërndarë kryetarëve të komisioneve dhe anëtarëve të Kryesisë së Parlamentit.
Myzyraj theksoi se deri më tani Partia Demokratike e ka kushtëzuar pjesëmarrjen e saj në këto komisione dhe ka ndërprerë komunikimin institucional në lidhje me reformat dhe aktet e tjera parlamentare. Kjo përfshin edhe procesin e zgjedhjes së drejtuesve të organeve të pavarura, si Komisioneri për Mbrojtjen nga Diskriminimi, ku PD-ja ka propozuar një formulë të ngjashme me atë të ndjekur për zgjedhjen e Avokatit të Popullit, i cili, sipas saj, u zgjodh në mënyrë të njëanshme nga Partia Socialiste.
