TENSIONE JEMEN-ARABI SAUDITE/ Riadi kërkon largimin e forcave të Emirateve nga Jemeni
Nga Fiorenca Cana Përditësimi i fundit 30 Dhjetor 2025, 16:32
Arabia Saudite ka kërkuar zyrtarisht largimin e forcave të Emirateve të Bashkuara Arabe nga Jemeni, duke e cilësuar praninë e tyre si kërcënim për sigurinë kombëtare. Përplasja mes dy aleatëve tradicionalë shënon një përshkallëzim serioz të krizës në koalicionin arab që prej vitesh vepron në këtë vend të përfshirë nga lufta. Situata rrezikon të ndikojë drejtpërdrejt në stabilitetin e gjithë rajonit.
Tensionet mes Arabisë Saudite dhe Emirateve të Bashkuara Arabe kanë hyrë në një fazë të re dhe më të rrezikshme, pas kërkesës zyrtare të Riadit për largimin e menjëhershëm të forcave emiratase nga territori i Jemenit.
Në një deklaratë zyrtare, autoritetet saudite e cilësuan praninë e tyre si kërcënim për sigurinë kombëtare dhe për stabilitetin e rajonit, duke e shpallur çështjen si “vijë të kuqe”.
Përplasja vjen në një moment delikat, kur të dy vendet kanë qenë për vite aleatë kryesorë në koalicionin ushtarak kundër rebelëve Huthi. Megjithatë, sipas Riadit, mbështetja e Emirateve për forcat separatiste në jug të Jemenit po minon përpjekjet për stabilitet dhe unitet territorial.
Situata u përshkallëzua pas një sulmi ajror të koalicionit saudit mbi portin strategjik të Mukallës, ku sipas burimeve zyrtare synoheshin dërgesa armësh të ardhura nga Emiratet pa autorizim.
Si reagim, Këshilli Presidencial i Jemenit, i mbështetur nga Arabia Saudite, anuloi marrëveshje sigurie me Emiratet dhe vendosi masa të forta, përfshirë bllokadë ajrore dhe detare, si dhe një afat 24-orësh për largimin e forcave emiratase.
Deri më tani, Emiratet e Bashkuara Arabe nuk kanë reaguar zyrtarisht. Analistët paralajmërojnë se përplasja rrezikon të thellojë ndarjet brenda kampit arab dhe të minojë çdo përpjekje për paqe të qëndrueshme në Jemen, duke e bërë situatën në rajon edhe më të paqëndrueshme.
