NGUSHTOHET RRETHI/ I dyshuari për sulmin ndaj ushtarit amerikan është shqiptar. Zbardhen detaje nga hetimet
Nga OraNews Përditësimi i fundit 30 Dhjetor 2025, 08:41
Një sulm me thikë i ndodhur natën mes së shtunës 27 dhe së dielës 28 dhjetor në Conegliano, Itali, ka tronditur zonën përreth një lokali nate. Viktimë e agresionit ka mbetur një ushtar amerikan 28-vjeçar, i stacionuar në bazën ushtarake të Shteteve të Bashkuara në Vicenza, i cili ndodhej në shoqërinë e një gruaje 37-vjeçare.
Ngjarja ka ndodhur rreth orës 03:00 të mëngjesit, jashtë lokalit të natës “Club Vibes”, kur çifti është përfshirë në një debat me një grup të rinjsh nga Europa Lindore, të njohur të gruas. Diskutimi është përshkallëzuar deri në dhunë, dhe gjatë konfliktit ushtari amerikan është goditur me thikë në bark.
Ulërimat e gruas kanë alarmuar banorët e zonës, të cilët kanë njoftuar menjëherë shërbimet e emergjencës. Të dy personat janë dërguar në spitalin e Coneglianos nga Suem 118. Fatmirësisht, plagosja e ushtarit rezultoi sipërfaqësore dhe jo kërcënuese për jetën; ai u lirua nga spitali që të dielën në mëngjes me një prognozë prej dhjetë ditësh. Gruaja pësoi vetëm lëndime të lehta.
Falë pamjeve të kamerave të sigurisë, karabinierët e Coneglianos kanë identifikuar autorin e dyshuar të sulmit: një shtetas shqiptar, bashkëqytetar i gruas 37-vjeçare. Sipas hetimeve paraprake, motivi i agresionit dyshohet të ketë qenë xhelozia, pa ndonjë lidhje sentimentale apo familjare mes autorit dhe gruas.
Prokuroria e Trevisos ka hapur një çështje për plagosje personale. Autori i dyshuar, i cili u largua nga vendngjarja para mbërritjes së ndihmës, mund të merret së shpejti nën hetim. Autoritetet amerikane të bazës së Vicenzës janë vënë në dijeni dhe po bashkëpunojnë me autoritetet italiane, duke ofruar mbështetje mjekësore dhe psikologjike për ushtarin e plagosur.
Drejtuesit e lokalit “Club Vibes” kanë theksuar se ngjarja ka ndodhur në rrugë publike, jashtë ambienteve të lokalit, dhe se personat e përfshirë nuk kishin lidhje me klubin.
