IA “ÇMEND” PRODHIMIN E ÇIPAVE/ Fluturojnë çmimet, mungesa e memories kërcënon zhvillimin e IA! Korporatat garojnë për furnizime, prodhuesit paralajmërojnë krizë
Nga OraNews Përditësimi i fundit 4 Dhjetor 2025, 14:28
Kriza globale e çipeve të memories po godet industrinë e teknologjisë, ndërsa çmimet rriten dhe furnizimet pakësohen me ritme të shpejta. Gjigantët e AI dhe elektronikës, nga Microsoft te Samsung, po garojnë për të siguruar memorien kritike që rrezikon të ngadalësojë zhvillimin e teknologjive të ardhshme.
Një mungesë akute globale e çipeve të memories ka nisur të shkaktojë tensione të forta në tregun botëror të teknologjisë, duke detyruar kompanitë më të mëdha të inteligjencës artificiale dhe elektronikës të garojnë për furnizime që po pakësohen me ritme të shpejta.
Prodhuesit e telefonave inteligjentë në Kinë paralajmërojnë rritje çmimesh, dyqanet japoneze po kufizojnë blerjet e pajisjeve të ruajtjes së të dhënave, ndërsa gjigantë si Microsoft, Google dhe ByteDance po përpiqen të sigurojnë kontrata të garantuara me prodhuesit Micron, Samsung dhe SK Hynix.
Kërkesa e jashtëzakonshme erdhi pas shpërthimit të bumit të AI, ku qendrat e të dhënave kërkojnë sasi rekord të memories së avancuar HBM, thelbësore për procesorët e Nvidia-s.
Çmimet e disa tipeve të memories janë më shumë se dyfishuar që prej shkurtit, duke nxitur ekonomistët të paralajmërojnë se mungesa mund të ngadalësojë zhvillimin e AI-së dhe investimet shumë miliardëshe në infrastrukturën dixhitale.
Gara globale për furnizime është intensifikuar aq shumë, sa kompani amerikane, evropiane dhe kineze po dërgojnë delegacione drejt Koresë së Jugut për të siguruar kontrata afatgjata, ndërsa Samsung dhe SK Hynix raportojnë se prodhimi i tyre i memories është pothuajse i shitur deri në vitin 2026.
Rritja e kostove ka nisur të reflektohet te konsumatorët, pasi mund të rriten çmimet e telefonave me 20% deri 30%, ndërsa prodhuesit e laptopëve po përgatiten të ndjekin të njëjtën rrugë.
Ekspertët paralajmërojnë se mungesa e memories mund të zgjasë deri në fund të vitit 2027, duke e kthyer krizën nga një problem të industrisë së çipeve në një rrezik të drejtpërdrejtë ekonomik global.
