TIKTOK KONTROLL AI/ Përdoruesit zgjedhin sa përmbajtje artificiale të shfaqet
Nga OraNews Përditësimi i fundit 21 Nëntor 2025, 15:18
TikTok prezanton një opsion të ri që u lejon përdoruesve të kontrollojnë se sa përmbajtje të krijuar nga inteligjenca artificiale shfaqet në rrjedhën e tyre. Funksioni do të jetë i aksesueshëm te “Manage Topics” në Settings. Ndërkohë, platforma po teston edhe një etiketë të padukshme për identifikimin e videove të gjeneruara nga AI.
TikTok po bën një hap të ri në menaxhimin e përmbajtjes me inteligjencë artificiale. Platforma ka prezantuar një veçori që u jep përdoruesve kontroll mbi sasinë e videove të krijuara nga AI që shohin në rrjedhën e tyre të përditshme.
Funksioni i ri gjendet te “Manage Topics” në seksionin Content Preferences, ku përdoruesi mund të zgjedhë të shohë më shumë ose më pak video që lidhen me inteligjencën artificiale.
Deri më tani, kjo pjesë shërbente për zgjedhjen e kategorive si sporti, kërcimi apo ushqimi.
TikTok shpjegon se kjo veçori nuk synon të ndërpresë përmbajtjen me AI, por ta personalizojë për çdo përdorues. Ata që duan ta eksplorojnë mund të shohin më tepër, ndërsa të tjerët mund ta kufizojnë.
Së bashku me këtë risi, TikTok po teston edhe një “shenjuës të padukshëm”. Kjo teknologji do të etiketojë videot e krijuara me AI, duke e bërë gati të pamundur fshirjen e etiketës edhe nëse përmbajtja ringarkohet ose montohet në platforma të tjera.
TikTok thekson se kjo masë vjen për të rritur transparencën dhe sigurinë për përdoruesit, pasi videot e gjeneruara me inteligjencë artificiale po bëhen çdo ditë e më të sofistikuara.
Në javët në vijim, funksioni do të jetë i aksesueshëm në mbarë botën. TikTok premton se do të investojë më tej në mjete krijuese me AI, por edhe në mënyra për t’i shënuar ato qartë.
