Rrezikon Botërorin 2026/ Zbulohet dënimi që ka marrë Ronaldo për kartonin e kuq ndaj Irlandës
Nga OraNews Përditësimi i fundit 26 Nëntor 2025, 07:36
Cristiano Ronaldo ka shmangur një pezullim të rëndë, teksa FIFA ka zyrtarizuar masën disiplinore për kartonin e kuq të marrë më 13 nëntor në Dublin kundër Irlandës.
Sulmuesi 40-vjeçar pritej gjerësisht të dënohej me dy ose tri ndeshje pezullim për përjashtimin direkt, por Komiteti Disiplinor i FIFA-s vendosi një skualifikim vetëm prej një ndeshjeje, dënim që ai e ka kryer tashmë në ndeshjen kualifikuese të Kupës së Botës kundër Armenisë, si dhe dy ndeshje të tjera me kusht, të cilat aktivizohen vetëm nëse Ronaldo përsërit sjellje të papërshtatshme.
Kjo do të thotë se ‘ylli’ portugez do të jetë i disponueshëm për ndeshjen hapëse të Portugalisë në Kupën e Botës 2026, për sa kohë që nuk përfshihet në incidente të tjera disiplinore.
Kartoni i kuq ishte përjashtimi i parë direkt në karrierën e tij ndërkombëtare prej 226 ndeshjesh. Ai erdhi pas një përplasjeje me mbrojtësin irlandez Dara O’Shea.
Gjyqtari Glenn Nyberg fillimisht i tregoi Ronaldos një karton të verdhë, por e shndërroi atë në të kuq pasi pa pamjet e VAR-it, një vendim që ngjalli menjëherë debate të forta.
Rekordi i pastër disiplinor i Ronaldos, sjellja e tij e mëparshme dhe rrethanat e episodit u morën parasysh para se FIFA të vendoste për një sanksion më të lehtë.
