Samiti i parë mes dy qeverive Itali - Shqipëri, Rama sot në Romë: I hapim rrugë 16 marrëveshjeve të reja
Nga OraNews Përditësimi i fundit 13 Nëntor 2025, 08:08
Kryeministri Edi Rama do të udhëtojë sot drejt Romës për të marrë pjesë në takimin e parë G2G me Italinë (Government to Government), një mbledhje e përbashkët e dy qeverive, në funksion të thellimit të mëtejshëm të bashkëpunimit mes vendeve, përmes projekteve të përbashkëta, në fusha si ekonomia, energjia, mbrojtja, infrastruktura, etj.
Mbledhja e parë mes qeverive të dy vendeve e cila do të drejtohet nga Kryeministrja e Italisë, Georgia Meloni dhe Kryeministri Edi Rama është konfirmuar nga qeveria italiane përmes një njoftimi të publikuar në faqen zyrtare ku thuhet se Samiti i parë ndërqeveritar Itali-Shqipëri do të mbahet të enjten, më datë 13 nëntor, ora 11:30.
Kryeministri Edi Rama ka ndarë një postim, ku shkruan se pritet hapja rrugë për 16 marrëveshje mes dy vendeve.
“MIRËMËNGJES dhe me krenarinë për një tjetër ditë historike në marrëdhëniet ndërkombëtare të Shqipërisë, mbledhjen e parë të përbashkët mes dy qeverive, e cila zhvillohet në Romë për t’i hapur rrugë 16 marrëveshjeve të reja konkrete të bashkëpunimit në kuadër të partneritetit të ngushtë strategjik me fqinjin tonë të çmuar perëndimor, ju uroj një ditë të mbarë”, shkruan Rama.
AGJENDA
Ditën e enjte, Kryeministri Rama do të takohet me Kryeministren e Italisë Giorgia Meloni dhe më pas së bashku me delegacionin e ministrave të kabinetit që e shoqëron, do të marrë pjesë në seancën plenare të mbledhjes ndërqeveritare.
Në agjendën e ditës së enjte është parashikuar edhe shkëmbimi i Marrëveshjeve Dypalëshe dhe Memorandumeve të Mirëkuptimit.
Në faqen zyrtare të qeverisë italiane u njoftua më herët se Samiti i parë ndërqeveritar Itali-Shqipëri që do të drejtohet nga Kryeministrja e Italisë, Georgia Meloni dhe Kryeministri Edi Rama do të mbahet të enjten, më datë 13 nëntor, ora 11:30.
Shqipëria dhe Italia kanë firmosur në vitin 2010 Deklaratën e Partneritetit Strategjik.
11:30 Mbërritja në Villa Doria Pamphili
11:40 Takim ndërmjet Kryeministrit të Republikës së Shqipërisë dhe Kryeministres së Republikës Italiane, znj. Giorgia Meloni
12:30 Seancë plenare dhe drekë punë
Pjesëmarrës:
* Z. Edi Rama, Kryeministër i Republikës së Shqipërisë
* Znj. Belinda Balluku, Zëvendëskryeministre dhe Ministre e Infrastrukturës dhe Energjisë
* Znj. Elisa Spiropali, Ministre për Evropën dhe Punët e Jashtme
* Z. Pirro Vengu, Ministër i Mbrojtjes
* Znj. Albana Koçiu, Ministre e Punëve të Brendshme
* Z. Petrit Malaj, Ministër i Financave
* Z. Besfort Lamallari, Ministër i Drejtësisë
* Znj. Delina Ibrahimaj, Ministre e Ekonomisë dhe Inovacionit
* Znj. Evis Sala, Ministre e Shëndetësisë dhe Mbrojtjes Sociale
* Z. Blendi Gonxhja, Ministër i Turizmit, Kulturës dhe Sporteve
* Z. Sofjan Jaupaj, Ministër i Mjedisit
* Z. Kevin Bufi, Këshilltar i Kryeministrit dhe Koordinator për Bashkëpunimin Rajonal (Sherpa)
* Znj. Egesta Murataj, Asistente e Kryeministrit
14:00 Shkëmbimi i Marrëveshjeve Dypalëshe dhe Memorandumeve të Mirëkuptimit
Pjesëmarrës:
* Z. Edi Rama, Kryeministër i Republikës së Shqipërisë
* Znj. Belinda Balluku, Zëvendëskryeministre dhe Ministre e Infrastrukturës dhe Energjisë
* Znj. Elisa Spiropali, Ministre për Evropën dhe Punët e Jashtme
* Z. Pirro Vengu, Ministër i Mbrojtjes
* Znj. Albana Koçiu, Ministre e Punëve të Brendshme
* Z. Petrit Malaj, Ministër i Financave
* Z. Besfort Lamallari, Ministër i Drejtësisë
* Znj. Delina Ibrahimaj, Ministre e Ekonomisë dhe Inovacionit
* Znj. Evis Sala, Ministre e Shëndetësisë dhe Mbrojtjes Sociale
* Z. Blendi Gonxhja, Ministër i Turizmit, Kulturës dhe Sporteve
* Z. Sofjan Jaupaj, Ministër i Mjedisit
* Znj. Laura Plaku (Saro), Drejtor Ekzekutiv i AIDA
* Z. Ardian Veliu, Administrator i KAYO
* Z. Haki Çako, Drejtor i Përgjithshëm i Agjencisë Kombëtare të Mbrojtjes Civile
* Z. Ermal Nufi, Zëvendës Sekretar i Përgjithshëm i Këshillit të Ministrave
* Z. Herald Jonuzaj, Drejtor i Departamentit të Akteve Rregullatore të Këshillit të Ministrave
* Znj. Etilda Gjonaj, Këshilltare ligjore e Kryeministrit
14:15 Dalje për mediat
