“Avokati financohet nga Sorosi”/ Debat dhe tension në gjyqin për tragjedinë e Gërdecit
Nga Edison Vatnikaj Përditësimi i fundit 30 Tetor 2025, 13:55
Shkak është bërë kërkesa e mbrojtësve të ish-ministrit të Mbrojtjes, Fatmir Mediu, për të revokuar vendimin e gjyqtares Irena Gjoka, e cila pranoi si palë në proces familjen Durda.
Sipas avokatëve të Mediut, avokati i familjes Durda, Dorjan Matlia, është drejtor i qendrës “Respublika”, një organizatë që – sipas tyre – është ngritur dhe financohet nga Fondacioni Soros.
Fatmir Mediu u shpreh gjatë seancës:
“Kjo zyrë është ngritur me fondet e Sorosit, është fakt. Me gjithë respektin për familjarët, në këtë proces nuk mund të ketë dy prokurori.”
Ndërsa Geraldo Durda, djali i një prej viktimave të tragjedisë, iu përgjigj Mediut:
“Ta ka dhënë përgjigjen Gjykata e Strasburgut! Lëre mandatin e deputetit dhe përballu me gjykatën.”
Ndërkohë, Fatmir Mediu ka kërkuar edhe përjashtimin e gjyqtares Irena Gjoka nga çështja “Gërdeci”, për shkak të sjelljes së saj.
Avokati Dorian Matlia, që përfaqëson palën e viktimave, u shpreh se për të shmangur tensionet ishte dakord që Geraldo Durda të largohej nga salla:
“Meqë kërkuan të dalë nga salla Geraldo Durda, atëherë jemi dakord të largohet, në mënyrë që të mos kemi pengesa.”
Në vijim, Fatmir Mediu reagoi duke thënë:
“Kemi 15 vite që ju dëgjojmë.”
Kjo deklaratë shkaktoi reagimin e menjëhershëm të Feruzan Durdës, i cili iu kundërpërgjigj Mediut:
“Nuk e financon Soros, se e ka marrë në vitin 2008 çështjen. Mos të thotë kemi 15 vjet që ju dëgjojmë, se jemi ne ata që duhet ta kishim djalin 25 vjeç. Ka ditëlindjen sot.”
