Në prag të takimit me presidentin Xi, Trump: Kina të na ndihmojë me Rusinë për t'i dhënë fund luftës në Ukrainë

Nga OraNews Përditësimi i fundit 25 Tetor 2025, 21:03

Donald Trump deklaron se do të dëshironte ndihmën e Kinës me Rusinë, teksa ai përpiqet të sjellë një fund të luftës në Ukrainë.

"Do të doja që Kina të na ndihmonte me Rusinë," tha presidenti amerikan në bord të Air Force One, ndërsa fluturonte drejt Azisë për një turne të shpejtë, ku do të takohet me Xi Jinpingun e Kinës në Korenë e Jugut.

Megjithatë, kjo mund të jetë vetëm një dëshirë. Kina është aleati më i madh i Rusisë dhe një mbështetje jetike për Moskën që kur Perëndimi vendosi sanksione mbi të për shkak të luftës në Ukrainë.

Komentet e Trump vijnë pas një jave të vështirë për Kievin – SHBA refuzoi t’i jepte raketa bregdetare Tomahaëk, liderët e BE-së nuk liruan paratë ruse të ngrira për të ndihmuar në mbrojtjen e saj, dhe ka pasur sulme vdekjeprurëse të tjera.

Një samit me Putinin në gusht nuk prodhoi asnjë rezultat konkret

"Çdo herë që flas me Vladimirin, kam biseda të mira dhe pastaj ato nuk çojnë askund," tha Trump më herët këtë javë.

Të mërkurën, ai njoftoi sanksione të reja ndaj dy kompanive më të mëdha të naftës në Rusi – ndërhyrjet e para direkte që administrata Trump ka vendosur ndaj Rusisë për shkak të luftës. Efekti afatgjatë i futjes në listë të zezë mbetet për t’u parë, por Kremlini tha se ishte “i imun” ndaj sanksioneve.

Cila është rëndësia e sanksioneve amerikane mbi naftën ruse?

Ndërsa pritet që takimi i Trump me Xi të fokusohet kryesisht te marrëdhëniet tregtare armiqësore midis SHBA dhe Kinës, Trump tha se do të fliste me Xi për "çdo gjë", përfshirë luftën në Ukrainë.

"Do të doja që Kina të na ndihmonte [me Rusinë]. Kam një marrëdhënie shumë të mirë... me Presidentin Xi. Shumë të mirë," tha ai, duke shtuar se Xi dëshiron të shohë përfundimin e luftës.

Më herët këtë javë, Trump tha se presidenti kinez "mund të ketë një ndikim të madh mbi Putin".

Pekini nuk ka kritikuar kurrë luftën e Rusisë në Ukrainë dhe është akuzuar nga SHBA dhe aleatët e saj për ndihmë ndaj përpjekjeve ushtarake të Rusisë – akuzë që Pekini e mohon – përmes blerjeve të naftës ruse dhe furnizimeve mujore me materiale me përdorim të dyfishtë (ato që kanë aplikime si tregtare, ashtu edhe ushtarake).

Putin dhe Xi më parë kanë lavdëruar marrëdhëniet midis vendeve të tyre si një "miqësi pa kufij", dhe Rusia shpreson që eksportet e gazit drejt Kinës dhe vendeve të tjera të zëvendësojnë të ardhurat e humbura pas vendosjes së sanksioneve perëndimore.

Marrëdhëniet e ngrohta midis Rusisë dhe Kinës u bënë të dukshme muajin e kaluar, kur Putin, Xi dhe Kim Jong Un i Koresë së Veriut u takuan në Pekin për një shfaqje të jashtëzakonshme të solidaritetit dhe fuqisë ushtarake.

Ndërsa Trump bëri komentet e tij në bord të Air Force One, skuadrat e emergjencës në Ukrainë ishin në vendngjarje pas sulmeve të tjera ruse, përfshirë disa në Kiev, ku disa persona humbën jetën, tha Presidenti ukrainas Volodymyr Zelensky.

"Asnjë vend nuk duhet të lihet vetëm përballë një të keqeje të tillë," shkroi ai në Telegram, duke përsëritur nevojën që aleatët e Ukrainës të rrisin mbështetjen.

Ndërkohë, në rajonin Belgorod të Rusisë, banorët që jetojnë pranë një digë u urdhëruan të evakuohen pasi një sulm ukrainas mbi rezervuarin lokal shkaktoi dëme që mund të çojnë në përmbytje, shkruan BBC.

Trump do të takohet me Xi më 30 tetor në margjinat e samitit të Bashkëpunimit Ekonomik Azi-Paqësor (APEC) në Korenë e Jugut.