EMRAT/ Tre shqiptarë në paraburgim në Britani, pas sekuestrimit të 203 kg "miell" me vlerë 17 milionë paund
Nga OraNews Përditësimi i fundit 24 Tetor 2025, 23:40
Tre shtetas shqiptarë janë lënë në paraburgim nga autoritetet britanike, nën akuzën e shpërndarjes së lëndëve narkotike të Klasit A, pasi policia sekuestroi 203 kilogramë kokainë në Dartford, Kent.
Sipas njoftimit zyrtar të Agjencisë Kombëtare të Krimit (NCA), të cilit i referohet Top Channel, të arrestuarit janë: Njazmir Ograbati, 32 vjeç, Hajri Kapo, 35 vjeç, dhe Genti Tota, 32 vjeç.
Të tre akuzohen për përfshirje në furnizimin dhe shpërndarjen e drogës me vlerë të përafërt prej 17 milionë paund.
Operacioni u zhvillua në bashkëpunim me Partneritetin kundër Krimit të Organizuar, një strukturë e përbërë nga oficerë të Agjencisë Kombëtare të Krimit dhe Policisë Metropolitane.
Të arrestuarit u paraqitën disa ditë më parë në Gjykatën e Magjistraturës në Maidstone, ku gjykata vendosi që ata të qëndrojnë në paraburgim deri në seancën e radhës.
Seanca tjetër për tre shqiptarët është planifikuar të mbahet më 14 nëntor në Gjykatën e Kurorës në Maidstone.
